عصمت شوکت
اپنی شہرہ آفاق قلبی واردات ”تلخیاں“ کی طویل نظم پر چھائیاں میں ”مادام“ سے خطاب کرتے ہوئے ساحر لدھیانوی مرحوم نے ایک کائناتی حقیقت کچھ یوں بیان کی ہے کہ:
آپ کہتی ہیں تو پھر ٹھیک ہی کہتی ہوں گی
میرے احباب نے تہذیب نہ سیکھی ہوگی
میرے ماحول میں انسان نہ بستے ہوں گے
بھوک آداب کے سانچے میں نہیں ڈھل سکتی
مفلسی حسِ لطافت کو مٹا دیتی ہے
بے شک یہ بھوک ہی ہے جس کی زیادتی عصمت کو کانچ کی چوڑی سے بھی ارزاں کر دیتی ہے اور بھوک کے ”مذہب“ میں جہنم کاکوئی کھٹکا بھی نہیں ہوتا اور حدیث مبارکہ بھی تو یاد کریں کہ ”بھوک کی انتہا انسان کو کفر تک لے جاتی ہے“۔ اپنے فر د فرد معاشرے کو دیکھ لیں، یہ عوامل صاف دکھائی دیں، شرط یہ ہے کہ آنکھوں پر اقتدار و اختیار کی عینک نہ لگی ہو۔ وہ جو دوسروں کی نظر سے دیکھنے اور دوسروں کی زبانوں سے سننے کے عادی ہیں، اگر انہیں ”سب اچھا“ ہی دکھائی دیتا ہے تو تاریخ میں زیادہ پیچھے جا کر انقلاب فرانس کی وجوہات جاننے کی مغز ماری کرنے کی بجائے اس ”بندوبست“ کا 2008ء کے انتخابات میں ہونے والا حشر ملاحظہ کر لینا چاہیے جو اپنے تیئں حکمران بن چکے اور حلف برادری کی تقریب میں زیب تن کرنے کے لیے شیروانیوں تک کے آرڈر دے چکے تھے۔
حکمرانوں کے نزدیک اگر”سب اچھا“ ہے تو کیا ان سے یہ پوچھنے کی جسارت کی جا سکتی ہے کہ روپے کی لاش پر ڈالر کا رقص ابلیس کیوں تھمنے میں نہیں آرہا، پٹرول تو ایک طرف، ہماری زرخیز دھرتی پر وافر مقدار میں پیدا ہونے والا آلو فی کلو کے اعتبار سے ڈالر تک کیوں جا پہنچا۔ آلو دہ ہوامیں سانس لینے اور آلودہ پانی پینے سے اپنے جسم کو موذی امراض میں مبتلا ہو جانے والوں کی دسترس سے زندگی بچانے والی ادویات کیوں باہر ہو گئی ہیں۔ غریب عوام کے بچوں کے فیڈر میں دودھ کیوں ختم ہوتا جارہا ہے۔ کیا کوئی حکمران خدا کو حاضر ناظر جان کر یہ دعوٰی کر سکتا ہے کہ عوام کو معیاری اور سستی اشیائے خورد و نوش واقع میسر ہیں؟
خاتمے کے نمائشی نہیں حقیقی اقدامات کی ضرورت ہے۔ ان مسائل کو ختم کرنا ہوگا۔ جو ہمارے وسائل کو ہڑپ کرتے جا رہے ہیں۔
وطن عزیز دنیا کے ان ممالک میں سے ایک ہے جسے قدرت نے جی کھول کر نعمتیں عطا کی ہیں۔ ہمارے ہاں اب بھی اتنا کچھ موجود ہے کہ ہم نہ صرف ترقی یافتہ ملکوں کے ہم پلہ ہو سکتے ہیں بلکہ امداد دینے والے بن سکتے ہیں۔ مسئلہ صرف نیتوں کے کھوٹ کا ہے اور جب حاکم طبقات کی نیتوں میں کھوٹ آجائے تو برکت اٹھ جایا کرتی ہے۔ دنیا کی زرخیز ترین زمینوں پر بھوک اگنے کا آغاز تب ہوا جب فیلڈ مارشل ایوب خان نے معاہدہ سندھ طاس کر کے تین دریا بھارت کے حوالے کر دیئے اس ملکی معیشت جس کا دارومدار ہی زراعت پر ہے۔ ہ پہلی ضرب تھی اس کے بعد آج تک ہر کسی نے اس کو لوٹا اور سرمایہ بیرون ملک منتقل کر دیا۔ یہ طبقہ کون ہے جس کے یورپ، عرب میں محلات ہیں اور سوئس بینکوں میں دولت کے انبار، سبھی جانتے ہیں۔ اکانومی کا ایک مسلمہ اصول ہے کہ جب کسی معاشرے میں معیار زندگی لڑکھڑا جائے تو وہاں اخلاقی جرائم بڑھ جاتے ہیں وہی بات جو عرصہ قبل سلطان صلاح الدین ایوبی نے بھی کہی تھی کہ ”جس معاشرے میں روٹی مہنگی ہو جائے وہاں مرد کی غیرت اور عورت کی عزت سستی ہو جاتی ہے۔ کیا آج یہ باتیں ہمیں ہمارے معاشرے میں دکھائی نہیں دیتیں؟ اگر کسی کو نہیں دکھائی دیتیں تو اس کے بارے میں مکرم الٰہی کچھ یوں فرماتے ہیں کہ ”آنکھیں اندھی نہیں ہوتیں دل اندھے ہوتے ہیں جو سینوں میں ہیں“ ہمیں اپنی معاشی حالت سدھارنی ہے تو بدامنی کا خاتمہ کرنا ہو گا۔ آئی ایم ایف کا کاسہ لیسی کی بجائے اپنے دستیاب وسائل کو استعمال میں لانا ہو گا۔ یہ بد امنی ہی ہے کہ جس کے باعث غیر ملکی سرمایہ کاری منجمند ہو کر رہ گئی اور ملکی سرمایہ دار بھی مغربی، خلیجی اور مشرقی بعید کے ممالک کی طرف چلا گیا۔ توانائی کے بحران کے حل کے لیے پچھلے کئی سالوں سے سن رہے ہیں کہ ”کوڑے سے بجلی بنے گی، منصوبہ بن گیا“ ترکی سے توانائی کے بحران کے حل کے لیے معاملات طے، اور یہ ہو گیا وہ ہو گیا،لیکن ایسا کوئی بھی منصوبہ ہمیں سر زمین پاکستان پر تکمیل کے مراحل طے کرتا تو دور کی بات اپنی بنیادیں استوار کرتا بھی نظر نہ آیا۔ نتیجہ یہ ہے کہ ہزاروں صنعتی یونٹ بند پڑے ہیں اور لاکھوں مزدور بیکار۔
خیر بات چلی تھی غربت و افلاس کی۔ اس کا خاتمہ صرف خلوص نیت سے ہی ممکن ہے۔ معیشت کو مضبوط بنیادیں فراہم کیے بغیر اس کے استحکام کی توقع عبث ہے۔ بدامنی کا خاتمہ خواہ کسی بھی طور پر ہو، غیر ملکی سرمایہ کاری کو راغب کرنے کی اولین شرط ہے۔ تاجر برادری کے لیے مراعاتی پیکج ایک بہتر اقدام ہے۔
توانائی کا بحران حل نہیں ہو تا تو کسی بھی درجے کے ملنے سے فائدہ اٹھانا ممکن نہیں۔ ایک بات اور، غریب غریب کی رٹ لگانے والی پارلیمنٹ کے گوشواروں کے مطابق امیر ترین جماعت کے مذکورہ بالا تمام منصوبوں میں غریب کے لئے کچھ نہیں ، سوائے تسلیوں، دلاسوں اور خوابوں کے۔ عمران خان سے التجا ہے کہ اپنے وزیروں سے کہیں کہ اپنے دفاتر کے درروازے کھولیں تاکہ غریب عوام کے مسائل حل ہو سکیں۔
(کالم نگارمختلف امورپرلکھتی ہیں)
٭……٭……٭

تحسین بخاری
میری ماں گاؤں میں بڑے بھائی کے پاس ہے،میرا گاؤں رحیم یار خان سے چالیس کلو میٹر کے فاصلے پر ہے،دریائے سندھ میرے گاؤں حویلی غوث شاہ سے نصف کلو میٹر پر ہے،صبح عید تھی،دل بوجھل سا تھا، سوچا ماں سے جا کر مل آؤں،لہٰذا میں رات کے دس بجے جیسے ہی ایک اکٹھ سے فارغ ہوا توفورا رحیم یار خان سے روانہ ہو گیا،میں گیارہ بجے گاؤں پہنچا۔سب فیملی ماں کے گرد جمع ہو کر بیٹھ گئی،دو گھنٹے تک خوب گپ شپ چلتی رہی اور پھر بارہ بجے وہاں سے اجازت لیکرمیں واپسی کیلیے روانہ ہو گیا،ایک بجے کے قریب میں اقبال آباد پہنچا اور جیسے ہی میں نے انٹری گیٹ کراس کیا تو رحیم یار خان روڈ پر کھڑے پولیس کے جوانوں کو دیکھ کر میں نے گاڑی کو بریک لگائی اور سائیڈ پر کھڑی کردی،صبح عید تھی مگر رات کے ایک بجے پنجاب پولیس کے یہ جوان اپنا گھر بار،اپنا پریوار،معصوم بچوں کو چھوڑ کرسڑکوں پر ڈیوٹی کر رہے تھے ڈیوٹی پر موجود تقریباً تمام ملازمین مجھے ذاتی طور پر جانتے تھے میں جا کر ان جوانوں سے گلے ملا،ڈیوٹی پر موجود آفیسر سے رسمی خیر خیریت پوچھ کر میں نے سوال کیا کہ صبح عید ہے اور آپ اس وقت یہاں ڈیوٹی پر موجود ہیں آپ کیا محسوس کر رہے ہیں،میرا سوال پوچھنا تھا کہ اس پولیس مین کی آنکھوں میں ایک دم آنسو امڈ آئے جیسے وہ کب سے اس انتظار میں تھا کہ کوئی اس کا دکھ بانٹنے والا اسے ملے اور وہ دل کھول کر اپنا بوجھ ہلکا کرے، اس کی آواز بھرا گئی،اس نے ہاتھ میں پکڑا رومال اپنے آنسو جذب کرنے کے لئے اپنی آنکھوں پر رکھا،میں نے اسے اپنے گلے سے لگایا،اس نے تھوڑے فاصلے پر پڑی بنچ کیطرف اشارا کرتے ہو ئے کہا کہ آئیں ذرا دو منٹ وہاں بیٹھتے ہیں۔میں نے محسوس کیا کہ اس نوجوان کو ایک عرصے بعد کسی سویلین سے ہمدر دی مل رہی تھی۔اس لیے وہ بھی دل کھول کر اپنے دل کا بوجھ ہلکا کرنا چاہتا تھا،ہم بنچ پر بیٹھ گئے،اس نوجوان نے اپنے ماتحت نوجوان کو بلایا اور چائے لانے کا کہا سامنے والا ہوٹل کھلا تھا مگر میں نے چائے پینے کی حامی اس شرط پر بھری کہ یہ چائے ڈیوٹی پر موجودتمام ملازمین کیلیے میری طرف سے ہو گی،نوجوان نے ٹھنڈی آہ بھری،دکھ اور شکوے کی آمیزش کے ساتھ مسکرانے کی کوشش کرتے ہوئے بولا سر جی ہم آپ لوگوں کی چائے کے حقدار کہاں ہیں ہم تو تنقید کے حقدار ہیں،ہم تو گالیاں سننے کے لئے ہیں،ہمارا سینہ یا تو دشمن کی گولی کھانے کے لئے ہے یا اپنوں کی تنقید کے پتھر سہنے کے لئے ہے۔ہم لاکھ اچھا کر لیں مگر ہم پولیس والے پبلک کی نظر میں برے ہی ہیں،ایک سویلین سے محبت اور ہمدردی کا اظہار دیکھ کر عجیب سا فیل ہو رہا ہے،جیسے یہ کوئی خواب ہو۔
نوجوان کا فون مسلسل بج رہا تھا م،وہ سکرین پر دیکھتا اور کال کاٹ رہا تھا۔میں نے پوچھا کس کا فون ہے اور آپ بار بار نظرانداز کیوں کر رہے ہیں؟
اس نے ایک لمبی سرد آہ بھری اپنی کیپ اتار کر اپنی گود میں رکھی اور سرد آہ بھرکر بولا یہ میری چھوٹی بیٹی عروسہ کا فون ہے، میں پیار سے اسے بلبل کہتا ہوں،یہ بالکل چھوٹی سی ہے،ابھی بولنا سیکھ رہی ہے اور تین دن سے مجھے فون کر کے یہی پوچھتی ہے
بابا!دھل تب آؤ دے (بابا گھر کب آؤ گے)
نوجوان نے کہا تیسرا روز ہے روزانہ گھر سے فون آ تا ہے مگر میں انھیں جھوٹی تسلی دے دیتا ہوں کہ بس آج شام کو آجاؤں گا۔
ذرا تصو ر کیجیے کہ عید کی خوشیوں بھرا تہوار ہو،آپ گزشتہ کئی ماہ سے گھر سے دور ڈیوٹی پر موجود ہوں،آپ کی ماں عید کے روز آپ کو سینے سے لگانے کے لئے بیقرار ہو،،چھوٹی بہن کو اسکی سہیلیاں اپنا اپنا عید کا سوٹ دکھا دکھا کر اس کا منہ چڑا رہی ہوں اور وہ بڑے مان سے انہیں کہ رہی ہو کہ بھیا کل تک آ جائے گا اور پھر دیکھنا میرے لیے ایسا سوٹ لائے گا کہ تمھارے سوٹ کی ایسی کی تیسی پھیر دے گا،آپ کی بیوی آپ کی آمد کے انتظار میں گھرکی صفائی کر کے ہر چیز سلیقے سے سجا نے میں لگی ہو کہ سرتاج آنے والا ہے،آپکی چھوٹی بیٹی آپ کو بار بار فون کر کے اپنی توتلی زبان میں جلدی آنے پر مجبو رکررہی ہو اور آپ کے لئے اسے اگنور کرنا مشکل ہو،ذرا تصور کیجیے آپ بھی اپنی آنکھوں میں عید اپنی فیملی میں منانے کے سپنے سجائے تیاری میں مصروف ہو۔عید کو محض ایک دن باقی رہ گیا ہو،آپ سامان پیک کر رہے ہوں اور آپ کو اچانک احکامات ملیں کہ آپ کی چھٹیاں منسوخ کر دی گئیں ہیں لہٰذا آپ گھر نہیں جا سکتے تو زراد دل پر ہاتھ رکھ کر بتائیے کہ آپ کے دل پر کیا گزرے گی،اور آپ کا عید کا روز کس حالت میں گزرے گا۔اس کا تصور بھی تکلیف دہ ہے۔مگر ہماری پولیس کے ساتھ ایسا ہر عید پر ہوتا ہے،وہ ہمارے تحفظ کے لئے ہر عیدپر اپنی فیملی سے دور ہوتے ہیں۔
پولیس ہمیشہ تنقید کی زد میں رہتی ہے،ہم تنقید کا کوئی بھی موقع ہاتھ سے جانے نہیں دیتے مگر کبھی ہم نے تصویر کا دوسرا رخ دیکھنے کی کوشش نہیں کرتے،عید کی رات اپنوں سے دوری کا دکھ سینے میں لیے ہماری حفاظت کے لئے روڈ پرکھڑے ان جوانوں کے سینے کے اندر ہم نے کبھی جھانکنے کی ضرورت ہی محسوس نہیں کی۔
قارئین محترم ہم زندگی کے ہر پہلو میں ہمیشہ دوسروں پر الزام دیتے ہیں مگر کبھی اپنے اوپر چیک اینڈ بیلنس نہیں رکھا، جو لوگ ہم سے فاصلے پر چلے جاتے ہیں۔ ہم نے کبھی اس کی وجہ جاننے کی کوشش ہی کی کہ کہیں ان فاصلوں کی وجہ ہمار ارویہ تو نہیں،کسی کے ساتھ اختیار کیا گیا اچھا یا برا رویہ اس کی راہ کا تعین کرتا ہے۔پولیس کے ساتھ بھی اجتماعی طور پرہمارا رویہ یہی ہے کہ بس پولیس بری ہے۔مگر میرا خیال ہے کہ اگر ہم چاہیں تو پولیس میں پائی جانیوالی خامیاں دور ہو سکتی ہیں اور اس کے لئے ہمیں پولیس سے متعلق اپنا یہ رویہ تبدیل کر نا ہوگا ا،اس کیلیے ہمیں باقاعدہ طور پر مہم شروع کرنی پڑے گی، ہم روزانہ اپنی جیب میں یا اپنی گاڑی میں دو چار پھول رکھ لیں اور راستے میں روڈ پر کھڑا جہاں بھی کوئی پولیس کا جوان ملیں ہم اپنی گاڑی روک کر اسے جا کر سلام کریں اور اسے اچھی مسکراہٹ کے ساتھ یہ ایک پھول پیش کردیں۔ مجھے پورا یقین ہے کہ پولیس ہمارے اس رویے سے متاثر ہو کراپنے اندر کی خامیاں دور کرنے پر مجبور ہو جائے گی۔آئیے آج سے پولیس کو پھول پیش کر کے ان کے اندر کی خامیاں دور کرنے کی مہم شروع کرتے ہیں۔
(کالم نگارسیاسی و سماجی ایشوز پرلکھتے ہیں)
٭……٭……٭

عاقل ندیم
تقریبا بیتالیس سالوں کے قلیل دورانیے میں افغانستان میں دو عالمی سپر طاقتوں کو انتہائی مہنگی جنگوں کے بعد شکست کی دھول چاٹنی پڑی ہے۔ سوویت یونین نے افغانستان پر اپنا قبضہ قائم رکھنے کے لیے ایک سو پچاس ارب ڈالر سے زیادہ خرچ کیے اور تقریبا بیس ہزار سے زیادہ فوجیوں کی قربانی دی۔ افغان جنگ نے سوویت یونین کو معاشی طور پر اتنا کمزور کیا کہ ایک انتہائی طاقتور ریاست اس جنگ کے فورا ًبعد دنیا کے نقشے سے غائب ہو گئی۔
اس جنگ نے افغانستان کو بھی ہمیشہ کے لیے بدل دیا۔ ایک اندازے کے مطابق سوویت قبضے کے دوران پندرہ سے بیس لاکھ کے درمیان افغان اپنی جانوں سے ہاتھ دھو بیٹھے۔ اس طرح پورے افغانستان کی آبادی میں چھ سے 11 فیصد عوام لقمہ اجل بن گئے۔ اس ہولناک جنگ سے جان بچاتے ہوئے تقریباً پچاس لاکھ سے زیادہ افغان عوام بیرون ملک ہجرت کرنے پر مجبور ہوگئے۔
سوویت قبضے کی آفت کے تقریبا دس سال بعد افغانستان ایک بار پھر ایک بڑی اُفتاد کا نشانہ بنا جب امریکہ نے افغانستان پر حملے کا فیصلہ کیا۔ سوویت اور امریکی قبضے کے درمیان کے دس سالوں میں مختلف افغان گروہ کابل پر تسلط کی خواہش میں آپس میں برسرپیکار رہے جس کی وجہ سے مزید افغان ہلاک ہوئے اور ایک بڑی تعداد دوبارہ ہجرت کرنے پر مجبور ہوئی۔
بیس سالہ امریکی قبضے کے دوران تقریباً 48 ہزار مزید افغانی شہری ہلاک ہوئے اور جاری خانہ جنگی میں تقریبا ً66 ہزار افغان فوجی مارے گئے۔ امریکی قبضے کے دوران تقریباً 27 لاکھ افغان دوبارہ بیرون ملک نقل مکانی پر مجبور ہوئے جبکہ 40 لاکھ کے قریب افغانستان میں ہی دربدر ہوئے۔ اس مہنگی ترین جنگ میں تقریباً 2500 امریکی فوجی ہلاک ہوئے اور 20 ہزار سے زیادہ زخمی ہوئے۔ اس کے علاوہ 4 ہزار کے قریب نجی امریکی کنٹریکٹر بھی مارے گئے۔ نیٹو افواج کے ساتھ شامل فوجی اور دیگر اشخاص کی ہلاکتیں 1200 کے قریب رہیں۔
امریکہ اپنی اس مہنگی ترین مہم جوئی میں امریکی وزارت خارجہ کے حالیہ اعداد و شمار کے مطابق اب تک دو کھرب اور 26 ارب ڈالر جھونک چکا ہے۔ یہ سرمایہ بے تحاشہ قرضے لیکر حاصل کیا گیا۔ اب تک صرف سود کی مد میں امریکہ نے اس مہم جوئی کے لیے 530 ارب ڈالر ادا کیے ہیں۔ اسی طرح اس جنگ میں شامل سابق فوجیوں اور اور دیگر اہلکاروں کے علاج اور دیگر سہولیات کے لیے 296 ارب ڈالرز خرچ کیے جا چکے ہیں اور ان اہلکاروں پر یہ اخراجات آنے والے کئی سالوں تک ادا کئے جائیں گے۔
اب جبکہ امریکہ نے افغانستان میں اپنی ناکامی کا اعتراف کرتے ہوئے واپسی کا فیصلہ کیا ہے تو طالبان کی نظریں اب کابل کی طرف ہیں اور وہ یہ امید لگائے بیٹھے ہیں کہ جلد کابل ان کے قدموں کے نیچے ہو گا۔
گو طالبان کسی حد تک یہ امید کرنے میں حق بجانب ہیں کیونکہ امریکی انخلا سے بظاہر مرکزی حکومت کمزور دکھائی دیتی ہے۔ طالبان کی حالیہ مضافاتی علاقوں کی فتوحات سے ان کے کچھ حمایتی عناصر طالبان کا افغانستان پر جلد ہی مکمل قبضہ یقینی سمجھ رہے ہیں لیکن طالبان کی مکمل فتح ابھی کافی دور ہے اور اس میں بہت سارے عناصر آڑے آ سکتے ہیں۔ اگر طالبان نے اپنے طرز عمل اور طرز حکومت کے بارے میں افغانیوں کی ایک بڑی تعداد میں موجود سنجیدہ خدشات کو رفع کرنے کی کوشش نہ کی تو بہت ممکن ہے کہ انہیں کابل اور دیگر بڑے شہروں پر قبضہ کرنے میں شدید مشکلات اور طالبان مخالف قوتوں کا سخت مقابلہ کرنا پڑے۔
مندرجہ ذیل وجوہات کی بنیاد پر طالبان کو افغانستان پر مکمل قبضہ کرنے اور ملک پر امن کے ساتھ حکومت کرنا تقریباً ناممکن ہوگا اگر وہ اپنی حکمت عملی اور سخت گیر نظریات میں تبدیلی نہ لائے۔ اس سلسلے میں انہوں نے کچھ نرمی کا اشارہ تو دیا ہے مگر یہ طالبان مخالف قوتوں کے خدشات ختم کرنے کے لیے کافی نہیں۔ سوویت یونین اور امریکہ جیسی سپر طاقتوں کی افغانستان میں پسپائی میں طالبان کے لیے کافی سبق پوشیدہ ہیں اور انھیں یہ سمجھنے کی ضرورت ہے کہ صرف طاقت کے بل بوتے پر افغان عوام کو زیرنگیں نہیں رکھا جا سکتا۔
طالبان کی پچھلی حکومت کے خاتمے کو 20 سال ہوا چاہتے ہیں اور اس عرصے کے دوران ایک نئے افغانستان نے جنم لیا ہے۔ افغانستان کے شہری علاقوں میں ایک واضح تبدیلی اور معاشی ترقی کے صاف نشانات نظر آتے ہیں۔ ماضی کے مقابلے میں کابل میں نئی بلند و بالا عمارتیں نظر آتی ہیں۔ نئی اور بہتر سڑکوں کا ایک جال بچھا دیا گیا ہے اور ماضی کے برعکس کابل ایک صاف ستھرا شہر دکھائی دیتا ہے۔ کابل میں کئی جگہ آپ کو بڑے بڑے شاپنگ سنٹر بھی نظر آتے ہیں۔ اسی طرح دوسری شہری سہولتوں میں بھی قابل توجہ اضافہ ہوا ہے۔ صحت کے شعبے میں کثیر سرمایہ کاری کی گئی ہے جس کی وجہ سے عام شہریوں کو صحت کی بہتر سہولتیں میسر ہوئی ہیں۔ اسی طرح تعلیم کے شعبے میں قابل رشک بہتری آئی ہے اور ہزاروں افغان طالب علم اپنے ہی ملک میں اعلی تعلیم حاصل کر رہے ہیں۔ ایک اندازے کے مطابق تقریبا دو کروڑ بیس لاکھ افغانیوں کو انٹرنیٹ کی سہولت میسر ہے۔ نائن الیون کے بعد بعد ایک نئی نسل جوان ہو چکی ہے جو ان سب سہولتوں کی عادی ہو چکی ہے۔ ایک تحقیق کے مطابق 60 سے 65 فیصد کے درمیان افغان آبادی نوجوانوں پر مشتمل ہے۔
افغان آبادی کے اس بڑے حصے کے لیے طالبان کا سخت قسم کی پابندیوں پر مبنی اقتدار بظاہر ناقابل قبول ہوگا۔ ان نوجوانوں نے طالبان کے اقتدار کے دوران ایک جابرانہ نظام حکومت کے بارے میں سنا ہوا ہے اور یہ ممکن ہے کہ وہ اپنی موجودہ سماجی سہولتوں پر مبنی طرز زندگی کے دفاع کے لیے ایک خود رو تحریک کی صورت میں طالبان کی واپسی کا مقابلہ کریں۔ یہ مزاحمت افغانستان کو مزید بدامنی کی طرف لے جا سکتی ہے اور طالبان کے مکمل قبضہ میں ایک بڑی رکاوٹ بھی بن سکتی ہے۔
اس سارے سیاسی کھیل میں نوجوان افغان فوج کی طاقت کو بھی نظر انداز کیا جا رہا ہے۔ کچھ دہی علاقوں میں افغان فوجیوں کے ہتھیار ڈالنے کو افغان فوج کی کمزوری اور اسے جلد ہی اس کے خاتمے سے تعبیر کیا جا رہا ہے۔ شواہد بتاتے ہیں کہ افغان فوج کی یہ پسپائی عارضی ہے کیونکہ انہوں نے کافی علاقے حال ہی میں طالبان سے واپس بھی لیے ہیں۔ افغان فوج کی اس عارضی پسپائی کو فوجی ماہرین امریکہ کے اچانک انخلا کے فیصلے سے فوجی سپلائی لائنوں میں تعطل یا خلل پیدا ہونے سے جوڑ رہے ہیں۔ جونہی یہ سپلائی لائن بحال ہو گئیں تو یقینا طالبان کو تربیت یافتہ اور جدید اسلحہ سے لیس افغان فوج کی طرف سے مزید سخت مزاحمت کا سامنا کرنا پڑے گا۔
طالبان کا افغانستان پر مکمل قبضہ پاکستان میں کچھ حلقوں کے لیے تو اطمینان کا باعث ہوسکتا ہے مگر اس فتح سے پاکستان میں متشدد مذہبی عناصر کی حوصلہ افزائی ہو گی اور وہ ریاست پاکستان کے لیے سنجیدہ سلامتی کے مسائل کھڑے کر سکتے ہیں۔ اس صورتحال سے فائدہ اٹھاتے ہوئے بھارت ان متشدد گروہوں میں سرایت کرکے ہمارے لیے سلامتی کے گھمبیر مسائل پیدا کر سکتا ہے۔ اس لئے ہماری کوشش کابل میں طالبان کی مکمل فتح کی امید کرنے کی بجائے ایک ایسی وسیع البنیاد حکومت کی تشکیل کی کوشش ہونی چاہیے جس میں ساری سیاسی اور نسلی قوتیں شامل ہوں۔
(کالم نگار پاکستان کے سابق سفیر ہیں)
٭……٭……٭