اپوزیشن اتحاد پاکستان ڈیمو کریٹک موومنٹ (پی ڈی ایم) اور جمعیت علمائے اسلام کے سربراہ مولانا فضل الرحمان نے بہاولپور میں ریلی کے دوران فارن فنڈنگ کیس پر 19 جنوری کو الیکشن کمیشن کے سامنے مظاہرے کا اعلان کردیا۔

ریلی سے خطاب میں مولانا فضل الرحمان کا کہنا تھا کہ ان لوگوں نے تبدیلی کو مذاق بنادیا ہے، انھیں حکومت کرنی نہیں آتی۔

ان کا کہنا تھا کہ  پہلے کہا مجھے تجربہ نہیں ہے، وقت چاہیے بعد میں بیان کی وضاحت کرتے ہیں جنھیں وضاحت کرنی اور صفائی پیش کرنی نہیں آتی وہ حکومت کیا چلائیں گے؟

مولانا فضل الرحمان کا کہنا تھا کہ یہ ملک عوام کا ہے اور عوام کا راج ہوگا، ہمارا مؤقف اصول پر ہے، ہم نےاصول کی بات کی ہے، پارٹیاں بیٹھتی ہیں تو مختلف زاویوں سے گفتگو کرتے ہیں، ہمارا مؤقف ایک ہے یہ دھاندلی کی حکومت ہے، اسے جانا ہوگا، کبھی ہم کارڈ دکھائیں گے تو کبھی چھپائیں گے، تم جلتے رہو گے۔

ان کا کہنا ہے کہ پی ڈی ایم میں سیاسی بالغ لوگ ہیں، تم بیساکھی پر چلنے والے ہو، تمہیں چلنا بھی نہیں آیا۔

اپوزیشن اتحاد کے سربراہ نے الیکشن کمیشن کے سامنے احتجاج کا اعلان کیا اور کہا کہ فارن فنڈنگ کیس کو الیکشن کمیشن مسلسل ملتوی کررہا ہے، یہ دنیا بھر سے آئے فنڈ کی خوردبرد کا کیس ہے، فارن فنڈنگ میں سب سے زیادہ پیسہ اسرائیل سے آیا ہے اور فارن فنڈنگ کیس پر 19 جنوری کو الیکشن کمیشن کے سامنے مظاہرہ کریں گے۔

بہاولپور: (ویب ڈیسک ) پاکستان مسلم لیگ (ن) کی نائب صدر مریم نواز شریف نے کہا ہے کہ اگر اپوزیشن اتحاد پی ڈی ایم استعفے دے دیئے تو حکومت کا کام تمام ہو جائے گا۔ جعلی وزیراعظم یاد رکھیں ان کو منہ چھپانے کی جگہ نہیں ملے گی۔

بہاولپور میں پی ڈی ایم کی ریلی سے خطاب میں کہنا تھا کہ اس حکومت کے دن گنے جا چکے ہیں۔ آج ملک میں مہنگائی سے ہر شخص پریشان ہے۔ جعلی حکومت کی وجہ سے عوام پس رہے ہیں۔ عوام نے فیصلہ سنادیا، حکومت کے دن گنے جا چکے ہیں۔

انہوں نے وزیراعظم عمران خان پر تنقید کرتے ہوئے کہا کہ انہوں نے ڈھائی سال بعد ہاتھ کھڑے کر دیئے کہ کام نہیں آتا۔ وزیراعظم کہتے ہیں کہ تیاری کے بغیر حکومت میں نہیں آنا چاہیے۔ ہمیں عوام کی پریشانی کا احساس ہے۔ چاہتے ہیں کہ جلد سے جلد وزیراعظم کو گھر بھیجیں۔

مریم نواز مسلم لیگ (ن) کے دور حکومت کا موجودہ سے موازنہ کرتے ہوئے کہنا تھا کہ ہمارے دور میں آٹا 35 آج 90 روپے کلو ہے۔ آج چینی 120 روپے کلو ہو چکی ہے۔ بجلی اور گیس کے نرخوں میں روزانہ اضافہ ہو رہا ہے۔ آئی ایم ایف نے کہا کہ بجلی کی قیمتیں 25 فیصد بڑھانا ہوں گی۔ عوام روٹی پوری کریں یا بجلی، گیس کے بل دیں؟

لیگی رہنما کا کہنا تھا کہ پنجاب کو کھڑا نہ ہونے کا طعنہ دیا جاتا تھا۔ سن لو! پنجاب اپنے حقوق کو واپس لینے کے لیے پوری طرح تیار ہے۔ انہوں نے ریلی میں موجود کارکنوں سے کہا کہ جب پنجاب کھڑا ہو جاتا ہے تو پتا ہے کس کی ٹانگیں کانپتی ہیں؟ ان کو اتنا خوف اور ڈر بلاوجہ نہیں ہے۔ سٹیبلشمنٹ اور سلیکٹڈ بھی دیکھ رہے ہیں۔

انہوں نے کہا کہ یہ تبدیلی کا نعرہ لگاتے تھے۔ عوام بتائیں کیا مہنگائی کے اس طوفان کو تبدیلی کہتے ہیں؟ کیا اس نالائقی، بے روزگاری کے سیلاب کو تبدیلی کہتے ہیں؟ کیا کشمیر فروشی کو تبدیلی کہتے ہیں؟ کیا غریب کے چولہے کی آگ بجھانے کو تبدیلی کہتے ہیں؟

ان کا کہنا تھا کہ بلوچستان میں کان کن شہید ہوگئے لیکن کسی کے کان پر جوں تک نہ رینگی، کیا اسے تبدیلی کہتے ہیں؟ بار بار کہتا ہے کہ فوج جانتی ہے میں کرپٹ نہیں ہوں۔ تم دو لاکھ روپیہ تنخواہ اور 300 کنال کا محل چلاتے ہو، پھر بھی کہتے ہو کہ فوج جانتی ہے کرپٹ نہیں ہوں۔

کسٹم انٹیلیجنس بلوچستان نے چمن میں کارروائی کے دوران غیر ملکی ٹائیرز، چائنیز نمک بمعہ کنٹینر قبضے میں لے لیے۔

کسٹم انٹیلیجنس آفیسر شبیر احمد کے مطابق فرنٹئیر کور بلوچستان کے ہمراہ باب دوستی چمن پر مشترکہ کارروائی کرتے ہوئے افغانی کنٹینر کی تلاشی کے دوران غیر ملکی اسمگل شدہ ایک ہزار 358 بیگز چائینیز نمک اور 1 ہزار 650 ایل ٹی وی ٹائیز برآمد کر لیے گئے۔

برآمد شدہ اسمگل کیے جانے والے سامان کی عالمی مارکیٹ میں مالیت تقریبا 2 کروڈ روپے بنتی ہے جبکہ قبضے میں لیے گئے کنٹینر کی قیمت ایک کروڑ روپے سے زاہد ہے۔

کسٹم حکام کے مطابق کارروائی ڈائریکٹر کسٹم انٹیلیجنس محمد اسماعیل کی ہدایت پر کی گئی جبکہ فرنٹئیر کور بلوچستان کے 123 ونگ کی سربراہی کمانڈنٹ سلمان نے کی

بلاول بھٹو کا کہنا ہے کہ وزیراعظم عمران خان کے پاس مسائل کا حل نہیں تو انہیں استعفیٰ دینا چاہیئے۔

تفصیلات کے مطابق ٹھٹھہ میں میڈیا سے گفتگو کرتے ہوئے پاکستان پیپلز پارٹی (پی پی پی) کے چیئرمین بلاول بھٹو زرداری نے وزیرِاعظم عمران خان کو ایک بار پھر تنقید کا نشانہ بناتے ہوئے کہا کہ اب بھی کہتے ہیں کہ وہ ٹریننگ پر ہیں، 3 سال ہونے کو ہیں، اب بھی یہ کہیں تو ہم کیا کریں؟ ان کے پاس مسائل کا حل نہیں تو انہیں استعفیٰ دینا چاہیئے۔

انھوں نے کہاکہ حکومتی وزراء پی ڈی ایم کے خلاف سازش کر رہے ہیں لیکن پی ڈی ایم متحد ہے، ہم ایک ہیں، پی ڈی ایم کی جیت پیپلز پارٹی کی جیت ہے۔

بلاول بھٹو نے کہا کہ پاکستان ڈیموکریکٹ موومنٹ کی تحریک مستحکم ہے، عوام کے تعاون سے سلیکٹڈ حکومت کو ہٹا کر عوامی حکومت لائیں گے،عوام پی ڈی ایم کا ساتھ دیں، کٹھ پتلی کو مل کر ہٹائیں گے۔

ان کا کہنا تھا کہ ٹھٹھہ کے عوام تاریخی بے روزگاری اور مہنگائی کا مقابلہ کر رہے ہیں، ناجائز اور نااہل وزیرِاعظم کی وجہ سے ٹھٹھہ کے عوام کو تکلیف دہ حالات سے گزرنا پڑ رہا ہے۔

پاکستان پیپلز پارٹی (پی پی پی) کے چیئرمین کا کہنا ہے کہ پاکستان کی معیشت افغانستان اور بنگلا دیش سے بھی پیچھے چلی گئی ہے، پاکستان پیپلز پارٹی نے عوام کی طاقت پر بھروسہ کیا ہے۔