مدھیہ پردیش: (ڈیلی خبریں) بھارت میں ایک خاتون پولیس اہلکار نے غلطی سے موٹر سائیکل لگ جانے پر نوجوان سے زبردستی اپنی وردی صاف کروائی اور تھپڑ بھی رسید کیا جس کی ویڈیو وائرل ہوگئی۔
بھارتی میڈیا کے مطابق مدھیہ پردیش میں نوجوان سے کپڑوں پر لگی کیچڑ صاف کروانے اور پھر تھپڑ مارنے کی ویڈیو وائرل ہونے پر انتظامیہ نے نوٹس لے لیا اور خاتون اہلکار کانسٹیبل ساشی کالا کے خلاف محکمہ جاتی انکوائری شروع کردی۔
سوشل میڈیا پر وائرل ہونے والی ویڈیو میں دیکھا جا سکتا ہے کہ سفید وردی میں ملبوس ایک خاتون پولیس اہلکار نوجوان سے اپنے ٹراؤزر کے پائنچوں پر مٹی صاف کروا رہی ہیں اور پھر جاتے ہوئے نوجوان کو ایک تھپڑ بھی رسید کیا۔
عینی شاہدین کے مطابق یہ واقعہ اس وقت پیش آیا جب نوجوان ریوا میں اپنی موٹر سائیکل ریورس کر رہا تھا اور ٹائر خاتون اہلکار سے ٹکرا گیا جس پر کچھ مٹی ٹراؤزر پر لگ گئی تھی۔
