پشاور: (ویب ڈیسک) پشاور میں آٹے، دالوں اور گھی کے بعد مرغی کا گوشت بھی عام آدمی کی پہنچ سے باہر ہو گیا، مرغی کی قیمت صرف دو ہفتوں میں 186 روپے سے بڑھ کر 251 روپے ہو گئی، شہریوں نے حکومت سے بڑھتی قیمتوں کو کنٹرول کرنے کا مطالبہ کردیا۔
بازار میں مرغی کے گوشت کی فی کلو قیمت میں دو ہفتوں کے دوران 65 روپے کا اضافہ دیکھنے میں آیا ہے، بڑھتی قیمتوں کے باعث شہری بھی پریشان ہوگئے ہیں، شہریوں کا کہنا ہے کہ مہنگائی کے باعث مشکلات میں اضافہ ہورہا ہے۔
دوسری جانب ڈیلروں اوردکانداروں کا کہنا ہے پولٹری فیڈ کی قیمتوں میں اضافے کے باعث نرخ بڑھے ہیں، فیڈ کی ایک بوری کی قیمت میں 600 روپے کا اضافہ ہوا ہے اور فیڈ کی بوری 3ہزار 400 سے بڑھ کر 4ہزار روپے ہوگئی ہے جبکہ فارمنگ میں بھی کمی آئی ہے۔
ڈیلروں کے مطابق پٹرول کی قیمتوں میں حالیہ اضافے کے باعث پنجاب سے پولٹری کی ترسیل پر آنے والے اخراجات بھی بڑھے ہیں جس کے باعث چکن کی قیمتوں میں مزید اضافے کا امکان ہے۔
پشاور میں آٹے، دالوں اور گھی کے بعد مرغی کا گوشت بھی عام آدمی کی پہنچ سے باہر
