کراچی: (ویب ڈیسک) حکومت عوامی مقبولیت کے فیصلوں کی بجائے ٹھوس اقدمات اٹھائے، سری لنکا جیسے حالات سے بچنے کے لئے آئی ایم ایف سے جلد از جلد بات شروع کی جائے۔ پاکستان بزنس کونسل نے وزیر اعظم شہباز شریف کو خط لکھ دیا۔
پاکستان بزنس کونسل نے وزیراعظم کو مشورہ دیا ہے کہ پٹرولیم مصنوعات پر دی گئی سبسڈی کوفوری ختم کیا جائے اور ایسے اقدامات نہ اٹھائیں جس سے مہنگائی میں اضافہ ہو، غیرضروری اشیاء کی درآمدات پر پابندی عائد کی جائے اور “ورک فرام ہوم” کی اجازت دی جائے، اس کے علاوہ کمرشل سینٹرز اور شادی ہالز کو جلد بند کرنے کے احکامات جاری کیے جائیں۔
خط میں مزید لکھا گیا ہے کہ حکومت کو سری لنکا جیسے حالات سے بچنے کے لئے جلد سے جلد آئی ایم ایف سے بات جیت کا آغاز کرنا چاہئے، برآمدات میں اضافے کے لئے ٹیکسٹائل کے علاوہ دیگر مصنوعات پر ٹیکس چھوٹ دی جائے اور مناسب ایکس چینج ریٹ کا تعین کیا جائے۔
توانائی کی قلت پر قابو پانے کے لئے ملک میں مزید ایل این جی ٹرمینلز کی تعمیرشروع کرنی چاہئے، نئے ٹرمینلز کی تعمیر سے دیگر پلانٹس کی کارکردگی بھی بڑھے گی۔
