نیروبی: (ویب ڈیسک) مشرقی افریقہ پر ایک دہائی سے زائد عرصے تک حکومت کرنے والے سابق صدر موائی کیباکی 90 برس کی عمر میں دنیا سے رخصت ہوگئے۔
غیر ملکی میڈیا کے مطابق افریقی ملک کینیا پر ایک دہائی تک حکمرانی کرنے والے کیباکی کی طبعیت سنہ 2002 میں کار حادثے کے بعد سے ناساز رہتی تھی تاہم موت کی وجوہات آفیشلی بیان نہیں کی گئیں۔
کینیا کے موجودہ صدر یوہورو کینیاٹا نے کیباکی کے انتقال پر اظہار افسوس کرتے ہوئے کہا کہ بحیثیت ملک و قوم ہم ایک عظیم لیڈر سے محروم ہوگئے۔
رپورٹ کے مطابق کیباکی نے کینیا کے تیسرے صدر کی حیثیت خدمات انجام دی اور دسمبر 2002 سے 2013 تک ملک پر حکومت کی۔
سنہ 2007 میں کیباکی کے دور صدارت کے دوران کینیا کے انتخابات کے دوران ملک میں بدترین فسادات ہوئے تھے جس میں 1100 افراد لقمہ اجل بنے تھے۔
میڈیا رپورٹ میں کہا گیا ہے کہ سابق صدر کیباکی نے افریقی ممالک کی نسبت کینیا کی معیشت کو مضبوط کیا، بنیادی ڈھانچے کو مضبوط بنانے کیلئے متعدد منصوبے متعارف کرائے اور صحت و تعلیم کے شعبوں کو فروغ دیا۔
