سری لنکا معاشی بحران، ہزاروں طلبا نے وزیر اعظم ہاؤس کا گھیراؤ کرلیا

کولمبو: (ویب ڈیسک) سری لنکا کی یونیورسٹیوں کے ہزاروں طلبا نے معاشی بحران اور اقدامات نہ کرنے پر وزیر اعظم مہندا راجا پکسا کے گھر کو گھیرے میں لے لیا اور استعفیٰ کا مطالبہ کردیا۔
عالمی میڈیا کے مطابق سری لنکا کو 1948 کی آزادی کے بعد بدترین معاشی بدحالی کا سامنا ہے۔ مہینوں کے طویل بلیک آؤٹ، ریکارڈ مہنگائی اور خوراک اور ایندھن کی شدید قلت نے عوامی انتشار میں اضافہ کردیا ہے۔
عوام کے شدید احتجاج کے بعد یونیورسٹی کے طالب علموں نے حکومت کے خلاف سڑکوں پر نکلنے اور مستعفی ہونے تک وزیراعظم کے گھر کا گھیراؤ کرنے کا اعلان کیا، جس کے پیش نظر پولیس نے دارالحکومت کولمبو کے آس پاس مختلف سڑکوں پر رکاوٹیں کھڑی کرکے راستے بند کیے تاہم طلبا رہنماؤں نے کولمبو میں وزیر اعظم ہاؤس کے کمپاؤنڈ کی باڑ کو دھکیل اور وزیراعظم ہاؤس تک پہنچنے میں کامیاب ہوگئے۔
مظاہرے کے دوران ایک نامعلوم طالبا رہنما نے کمپاؤنڈ کی دیوار کے اوپر کھڑے ہوکر سیکورٹی کو مخاطب کرتے ہوئے کہا ’آپ سڑک بلاک کر سکتے ہیں، لیکن ہماری جدوجہد کو اس وقت تک نہیں روک سکتے جب تک کہ پوری حکومت تبدیل نہیں ہوجاتی‘۔
پولیس کے مطابق مظاہرے کے دوران وزیر اعظم اس وقت سرکاری رہائش گاہ پر موجود نہیں تھے جبکہ کچھ دیر بعد مظاہرین منتشر ہوگئے۔
واضح رہے کہ دو ہفتوں سے زیادہ عرصے سے ہزاروں مظاہرین سری لنکن صدر گوٹا بایا راجا پکسا (وزیر اعظم کے چھوٹے بھائی) کے دفتر کے باہر ڈیرہ ڈالے ہوئے ہیں جبکہ ملک گیر احتجاج میں حکومتی شخصیات کے گھروں اور دفاتر پر متعدد بار دھاوے بولے جاچکے ہیں۔