ایبٹ آباد: (ویب ڈیسک) خیبر پختونخوا کے وزیراعلیٰ محمود خان نے کہا ہے کہ امپورٹڈ حکومت بری طرح پھنس چکی ہے، بہت جلد انتخابات دیکھ رہا ہوں۔
ایبٹ آباد میں پی ٹی آئی ورکرز کنونشن سے خطاب کرتے ہوئے وزیراعلیٰ خیبرپختونخوا محمود خان کا کہنا تھا کہ آزادی مارچ کو کامیاب بنانے میں ایبٹ آباد سمیت پورے خیبر پختونخوا کا سب سے اہم کردار ہوگا، اس ماہ کے دس دن اہم ہیں، بہت جلد انتخابات ہوتا دیکھ رہا ہوں۔
ان کا کہنا تھا کہ اگلے انتخابات میں پی ٹی آئی بھاری اکثریت کے ساتھ حکومت بنائے گی، زرداری انتخابی اصلاحات کی بات کر رہا ہے، وہ پہلے سندھ میں اصلاحات تو کرے، جس پر فرد جرم عائد ہونا تھا وہ ملک کا وزیراعظم بن گیا، نااہلوں کو پتہ بھی نہیں کہ وہ کس دلدل میں پھنس گئے ہیں۔
انہوں نے کہا کہ تناول انٹرچینج کا منصوبہ حویلیاں ہسپتال کی اپ گریڈیشن اور رابطہ سڑکوں کے منصوبے بھی اگلے بجٹ شامل کریں گے۔
