اسلام آباد: (ویب ڈیسک) سپریم کورٹ میں وزیراعظم شہباز شریف کی نااہلی کیلئے درخواست دائر کردی گئی۔
تحریک انصاف کی رہنما عندلیب عباس نے درخواست دائر کی جس میں وزیراعظم شہباز شریف کی 62(1) ایف کی تحت نااہلی کی استدعا کی گئی۔
درخواست میں موقف اختیار کیا گیا کہ وزیر اعظم شہباز شریف نے اپنے اختیارات کا ناجائز استعمال کیا، وہ اپنے دوروں کے دوران اشتہاری اور سزا یافتہ ملزمان سے ملاقاتیں کر رہے ہیں۔
درخواست گزار نے کہا کہ سابق وزیراعظم نواز شریف کو احتساب عدالت نے دس سال قید اور 80 لاکھ جرمانہ کی سز ا سنا رکھی ہے۔
عندلیب عباس نے کہا کہ بیرون ملک دوروں میں حسین نواز ، سلمان شہباز اور اسحاق ڈار سے بھی ملاقاتیں کی گئیں، جس سے وزیراعظم شہباز شریف نے اپنے آئین کی خلاف ورزی کی، لہذا انہیں نااہل کیا جائے۔
