پاکستان ، یو اے ای کا معیشت سمیت تمام شعبوں میں تعاون کو مزید گہرا کرنے پر اتفاق

اسلام آباد: (ویب ڈیسک) پاکستان اورمتحدہ عرب امارات نے معیشت، تجارت، توانائی اور سرمایہ کاری سمیت تمام شعبوں میں باہمی تعاون کو مزید گہرا کرنے پر اتفاق کیا ہے۔
وزارت خارجہ کی طرف سے جاری بیان کے مطابق یہ اتفاق رائے وزیر خارجہ بلاول بھٹوزرداری اور متحدہ عرب امارات کے وزیر خارجہ شیخ عبداللہ بن زید النہیان کے درمیان ملاقات میں ہوئی ۔ یہ ملاقات ابوظہبی میں سالانہ سر بنی یاس فورم کے موقع پر ہوئی ۔
وزیر خارجہ نے پاکستان میں سیلاب سے متاثرہ افراد کی فراخدلی سے مدد کرنے پر متحدہ عرب امارات کی قیادت کا شکریہ ادا کرتے ہوئے کہا کہ یواے کی جانب سے پاکستان میں سیلاب سے متاثرہ افراد کی فراخدلانہ امداد دونوں ممالک کے درمیان گہرے اور برادرانہ تعلقات کا مظہر ہے جو ضرورت کی گھڑی میں ایک دوسرے کے ساتھ کھڑے رہے ہیں۔
انہوں نے کہاکہ متحدہ عرب امارات ہمیشہ مشکل وقت میں پاکستان میں انسانی ہمدردی کی بنیادپر امداد اورمعاونت کے سب سے بڑے عطیہ دہندگان میں سرفہرست رہاہے ۔
وزیر خارجہ نے اپنے یو اے ای کے ہم منصب کو سالانہ سر بنی یاس فورم کی کامیاب میزبانی پر مبارکباد دی۔
دونوں وزرائے خارجہ نے پاکستان اور متحدہ عرب امارات کے مابین تعلقات کی اہمیت پر زور دیا اور معیشت، تجارت، توانائی اور سرمایہ کاری سمیت تمام شعبوں میں باہمی تعاون کو مزید گہرا کرنے پر اتفاق کیا۔ وزیر خارجہ نے دونوں ممالک کے درمیان تجارت اور سرمایہ کاری کے حجم میں اضافے کی ضرورت پر زور دیا۔
دونوں رہنماں نے باہمی دلچسپی کے علاقائی اور بین الاقوامی امور پر تبادلہ خیال کیا اور دونوں برادر ممالک کے درمیان قریبی تعاون جاری رکھنے پر اتفاق کیا۔