آئین کی پاسداری تک ملک آگے نہیں بڑھ سکتا، سیاسی انتشار شفاف الیکشن سے ختم ہوگا: شبلی فراز

لاہور: (ویب ڈیسک) سابق وفاقی وزیر و تحریک انصاف کے رہنما شبلی فراز نے کہا ہے کہ آئین کی پاسداری تک ملک آگے نہیں بڑھ سکتا، سیاسی انتشار صاف اور شفاف الیکشن سے ہی ختم ہوگا۔
شبلی فراز کا کہنا تھا کہ گزشتہ 8 ماہ سےملک کو سیاسی عدم استحکام کا شکار کیا جا رہا ہے، یہ ملک کے لیے انتہائی خطرناک ہے، جو کچھ بھی کیا جا رہا ہے اس سے ملک کمزور ہو رہا ہے، ملک کو انارکی کی طرف دھکیلا جا رہا ہے، دہشت گردی خیبرپختونخوا سے اسلام آباد تک پہنچ گئی ہے۔
سابق وفاقی وزیر نے کہا کہ ملک میں جس کی لاٹھی اس کی بھینس کا قانون چل رہا ہے، ایک گورنرمنتخب لوگوں کو برطرف کر رہا ہے، سیاسی انتشار صاف اور شفاف الیکشن سے ہی ختم ہوگا، قانون کو گھر کی لونڈی بنا لیا گیا ہے، آئین کی پاسداری تک ملک آگے نہیں بڑھ سکتا۔
شبلی فراز نے کہا کہ اس ٹولے کو پتا ہے وہ الیکشن نہیں جیت سکتے، نا اہل ٹولہ جس طرح حکومت چلا رہا ہے ان کو تو جوتے پڑنے چاہئیں۔