کراچی: (ویب ڈیسک) پاکستان سپر لیگ (پی ایس ایل) سیزن 8 کے 13 ہویں میچ میں اسلام آباد یونائیٹڈ نے کوئٹہ گلیڈی ایٹرز کو یک طرفہ مقابلے کے بعد 63 رنز سے شکست دے دی۔
نیشنل اسٹیڈیم کراچی میں کھیلے گئے میچ میں کوئٹہ کی ٹیم اسلام آباد کی جانب سے دیا گیا 221 رنز کا پہاڑ جیسا ہدف حاصل کرنے میں ناکام رہی اور پوری ٹیم 157 رنر پر ڈھیر ہو گئی۔
کوئٹہ کی جانب سے محمد حفیظ نے 48، سرفراز نے 41 اور افتخار نے 39 رنز کی اننگز کھیلی۔ اسلام آباد کے فضل حق فاروقی اور حسن علی نے تین تین جب کہ ابرار اور شاداب نے دو دو وکٹیں حاصل کیں۔
اس سے پہلے اسلام آباد ہونائیٹڈ نے کوئٹہ گلیڈی ایٹرز کے خلاف ٹاس جیت کر بیٹنگ کا فیصلہ کیا ۔
اسلام آباد کو ابتدائی اوورز میں دباو کا سامنا کرنا،ٹیم کے دو کھلاڑی 28 رنز بنا کر پویلین لوٹ گئے جس کے بعد شاداب خان کریز پر آئے تاہم ان کا سفر بھی 12 رنز پر جلد ہی اختتام پذیر ہو گیا۔
اس موقع پر اعظم خان نے آصف علی کے ساتھ 91 رنز کی بڑی شراکت داری بنائی، آصف علی 42 رنز پر آؤٹ ہوئے۔ دوسری طرف سے اعظم خان کا بلا رنز اگلتا رہا اور انہوں نے میدان کے چاروں اطراف چوکے چھکوں کی بارش کر دی۔
اعظم خان نے 42 گیندوں پر 8 چھکوں اور 9 چوکوں کی مدد سے 97 رنز کی باری کھیلی۔ کوئٹہ گلیڈی ایٹرز کی جانب سے حسنین اور اوڈین اسمتھ نے دو دو کھلاڑیوں کو آؤٹ کیا۔
