کراچی : (ویب ڈیسک) صوبائی وزیر شرجیل میمن کاکہنا ہے کہ عمران خان نے سائفرکا ڈرامہ رچا کر پوری قوم کو ٹرک کی بتی کے پیچھے لگایا اور پھر اس نے قوم سے جھوٹ بولنے پر معافی بھی نہیں مانگی۔
کراچی میں پریس کانفرنس کرتے ہوئے سندھ کے صوبائی وزیر اور پیپلزپارٹی کے رہنما شرجیل میمن کا کہنا تھا کہ بلاول بھٹو آج 3 دن کے دورے پر کشمیرجا رہے ہیں، ان کا ہر بیرونی ملک دورہ کامیاب رہا، انہوں ہر فورم پر کشمیر کا مقدمہ لڑا، ہم کشمیر کے معاملے پر کوئی سمجھوتا نہیں کریں گے۔
شرجیل میمن کا کہنا تھا کہ مودی نے اقتدار میں آکر کشمیر کی حیثیت بدل دی، کشمیر کی حیثیت عمران خان کے دور میں تبدیل کی گئی، پی ٹی آئی چیئرمین نے کشمیر پر بہت کوتاہیاں کیں ،اس نے پاکستان کاز کو بھی نقصان پہنچایا، عالمی سطح پر پاکستان کی عزت کومجروح کیا اور ملکی اداروں پر تنقید کی، آج تک کسی بھی حکمران نے اس طرح اپنے اداروں پر تنقید نہیں کی۔
صوبائی وزیر نے کہا کہ عوام سے کہتا ہوں کہ خدا کے واسطے اپنی آنکھیں کھولیں، لیڈر کا مطلب ہے کہ وہ قوم کو صحیح اور غلط کا بتائے اور قوم کو درست سمت میں لے کر جائے، عمران خان صرف اپنے اقتدار کیلئے قوم سے جھوٹ بولتے ہیں، عوام منافقت کے خلاف آنکھیں کھولے، پی ٹی آئی چیئرمین ذہنوں میں نفرت انڈیل رہے ہیں۔
رہنما پی پی پی نے کہا کہ ہم سیاسی لوگ ہیں کسی کوجیل میں دیکھ کرخوشی نہیں ہوتی، سیاست میں اختلاف رائے ہوتا ہے، دشمنی نہیں ہوتی، ایک ملک میں بسنے والے سب ایک قوم ہیں، لیکن عمران خان نے قوم اور اداروں کو لڑانے کی کوشش کی، اور ذہنوں میں نفرت کی آگ بھڑکائی، اور تمام تر ریڈ لائنز کراس کر دیں۔
شرجیل میمن کا کہنا تھا کہ لوگوں کو جہازوں میں بھر بھر کر لایا گیا اور عمران خان کی حکومت بنائی گئی، لیکن اس نے خود کو لانے والوں کو بھی شرمندہ کیا، یہ پہلا وزیراعظم ہے جس کو عدم اعتماد کے ذریعے ہٹایا گیا، اس میں ریاست چلانے کی کوئی اہلیت ہی نہیں۔
انہوں نے کہا کہ عمران خان نے بیرون ملک لوگوں کو بولا کہہ مجھے آرمی چیف نے ہٹایا، پاکستان کی عوام کے سامنے امریکا کا نام لے رہے ہیں، ان کے بیانات میں تضاد نہیں منافقت ہے۔
صوبائی وزیر کا کہنا تھا کہ عمران خان کو القادر ٹرسٹ کیس میں کوئی بھی نہیں بچاسکتا، اس کیس میں کسی گواہ کی ضرورت نہیں، پی ٹی آئی چیئرمین کی سزا کیلئے بینک اسٹیٹمنٹ ہی کافی ہے، ان کے خلاف بی آر ٹی کے کیسز ہے، اس نے اپنے محلات کو ریگولائز کروایا، اس کے کہنے پر بسیں جلوائی گئی، اسی کے کہنے پر تنصیبات پر حملے کروائے گئے، اور اب مغرب کی مدد لے رہا ہے، کچھ بھی ہوجائےعمران خان کو جیل جانا پڑےگا۔
شرجیل میمن نے مزید کہا کہ ملک اس وقت معاشی دباؤمیں ہے، عمران خان نے ملک کو اس نہج پر پہنچایا، ہمارا یہ سال بھی افراتفری میں گزرگیا، پاکستان پیپلز پارٹی آڈیو اور ویڈیو لیکس کے خلاف ہے، سیاستدان جیل سے نہیں ڈرتا۔
