علاقائی انتظامیہ رات کو 2 بجے آکر گھر خالی کروا رہی ہے، اداکار خالد انعم

کراچی:(ویب ڈیسک) پاکستان شوبز کے سینئر اداکار خالد انعم نے علاقائی انتظامیہ کیلئے سوشل میڈیا پر پیغام جاری کر دیا۔ خالد انعم نے سوشل میڈیا پر پیغام جاری کرتے ہوئے علاقائی انتظامیہ سے اپیل کی ہے کہ وہ رات گئے گھر کی گھنٹی بجا کر گھر خالی کرنے کے احکامات جاری نہ کریں۔ اداکار نے کہا کہ ان کی اور علاقہ مکینوں کی یہی آواز ہے کہ اس طرح سے انہیں تنگ نہ کیا جائے۔ ان کا کہنا تھا کہ ہم بین الااقوامی موسم کی رپورٹس پڑھ رہے ہیں اور جانتے ہیں کہ ایسا کوئی خطرہ نہیں ہے کہ گھر خالی کرنا پڑے البتہ گھروں میں رہنے کی ہدایت پر ضرور عمل کریں گے۔ خالد انعم نے سوال اُٹھایا کہ کیا جو چیزیں ہم یہاں چھوڑ کر جائیں گے اس کی وہ ذمہ داری لیں گے۔ ان کا کہنا تھا کہ اگر انتظامیہ کو کوئی بات کرنی ہے تو دن میں آئے رات گئے گھروں کے باہر سائرن بجانا گھنٹی بجا کر گھر خالی کروانا یہ کوئی طریقہ کار نہیں ہے۔ یاد رہے کہ خطرناک سمندری طوفان بپر جوائے کا بھارتی شہر گجرات اور کراچی سے فاصلہ مزید کم گیا ہے۔ طوفان کے پیشِ نظر ساحل کے قریب موجود گھروں کو خالی کروایا جارہا ہے۔