میسا چوسٹس:(ویب ڈیسک) ہارورڈ میڈیکل کالج کے مردہ خانے کے 55 سالہ منیجر سیڈرک لاج کو لاشوں سے اعضا نکال کر فروخت کرنے پر گرفتار کرلیا گیا۔ امریکی ریاست پنسلوانیا میں عالمی شہرت یافتہ میڈیکل کالج ہارورڈ کا منیجر 55 سالہ سیڈرک لاج اپنی اہلیہ اور 5 دیگر کارندوں کے ساتھ مل کر مردہ جسموں سے اعضا نکال کر ملک گیر نیٹ ورک کے ذریعے اندرون ملک اور بیرون ملک اسمگل کیا کرتے تھے۔ مردہ خانے کا منیجر چوری شدہ اعضا کو نیو ہیمپشائر کے گوفسٹاؤن میں اپنے گھر لے جاتا جہاں اس کی اہلیہ نے ان اعضا کو دو دیگر ملزمان کترینہ میکلین اور جوشوا ٹیلر کو فروخت کیا۔ علاوہ ازیں سیڈرک لاج نے بعض اوقات 44 سالہ میکلین اور 46 سالہ ٹیلر کو مردہ خانے میں داخل ہونے کی اجازت دی تھی۔ جہاں دونوں ملزمان نے اپنی پسند سے اعضا کا انتخاب کیا اور قیمت لگا کر خریدا۔ میکلین نے ایک مردہ کی جلد شریک ملزم ٹیلر کو بھیجی تھی تاکہ وہ چمڑا بنانے میں کام آنے کے استعمال پر غور کریں۔ ہارورڈ کالج کے منیجر نے ان دونوں انسانی اعضا کے اسمگلرز سے کئی بار سودے بازی کی۔ پکڑے جانے پر منیجر سیڈرک کو نوکری سے برطرف کردیا گیا اور تفتیش میں شواہد سامنے آنے پر گرفتار بھی کرلیا گیا۔ اٹارنی جیرارڈ کرم نے کہا کہ کچھ جرائم سمجھ سے باہر ہیں۔ یہ خاص طور پر افسوسناک ہے کہ یہاں لواحقین نے اپنے پیاروں کی لاشیں رضاکارانہ طور پر طبی پیشہ ور افراد کو تعلیم دینے اور سائنس اور شفا کے مفادات کو آگے بڑھانے کے لیے دی تھیں۔ ہارورڈ یونیورسٹی کی میڈیسن فیکلٹی کے ڈین جارج ڈیلی اور میڈیکل ایجوکیشن کے ڈین ایڈورڈ ہنڈرٹ نے ایک مشترکہ بیان میں کہا کہ ہم یہ جان کر حیران ہیں کہ ہمارے کیمپس میں کچھ اتنا پریشان کن ہو سکتا ہے۔
