نگراں وزیر اطلاعات بلوچستان جان اچکزئی کا کہنا ہے کہ مسلح افواج نے ملکی سلامتی کوچیلنج کرنے والوں کا بھرپورجواب دیا، بلوچ خواتین کا ڈرامہ بُری طرح فلاپ ہوگیا۔
گرشتہ روز بلوچستان حملے کے جواب میں پاکستان کی جانب سے ایران میں جوابی کارروائی پربات کرتے ہوئے صوبائی وزیر اطلاعات نے کہا کہ آرمی چیف کےایکشن سےبھارتی دہشت گردی کانیٹ ورک بےنقاب ہوا۔
انہوں نے کہا کہ آرمی چیف کی قیادت میں پاک فوج نےقوم کا سرفخرسے بلند کیا۔ قوم،خاص کراہلیان بلوچستان پاک فوج کےمشکورہیں۔
جان اچکزئی کا کہنا تھا کہ اسلام آباد میں بلوچ خواتین کاڈرامہ بری طرح فلاپ ہوگیا، یہ ڈرامہ بھارت میں تیار کیا گیا تھا۔
واضح رہے کہ ایران نے منگل 16 جنوری کو قبل پاکستان کی سرحدی حدود کی خلاف ورزی کرتے ہوئے بلوچستان کے علاقے میں میزائل اور ڈرون حملہ کرکے 2 بچیوں کو شہید اور 3 کو زخمی کر دیا تھا۔
پاکستان نے بلوچستان کے حملے کی شدید الفاظ میں مذمت کی اور اسے پاکستان کی خود مختاری کی خلاف ورزی، دو طرفہ تعلقات کے منافی قرار دیا تھا۔
پاکستان نے بلوچستان پر حملے کے جواب میں آپریشن مرگ بر، سرمچار کے ذریعے ایران کو جواب دے دیا۔
ترجمان دفتر خارجہ کے مطابق پاکستان نے جمعرات 18 جنوری کو ایران کے صوبے سیستان میں دہشت گردوں کی مخصوص پناہ گاہوں کو نشانہ بنایا، جس کے دوران متعدد دہشت گرد مارے گئے۔
