سائبر کرائم وارداتوں میں اضافہ حکومت ناکام شہری پریشان

ملتان(انوسٹی گیشن سیل) انٹرنیٹ کا استعمال پاکستان بھر میں جہاں تیزی سے بڑھ رہا ہے، وہیں پر اس کے غلط استعمال سے سائبر کرائم میں بھی تیزی سے اضافہ ہو رہا ہے۔ مذہبی انتہا پسندی ، فرقہ واریت اور مذہب کے نام پر پھیلائی جانے والی نفرت کے فروغ میں جہاں سوشل میڈیا کا کردار واضح ہو کر سامنے آگیا ہے۔ اس کے ساتھ ساتھ لوگوں کی پگڑیاں اچھال کر بلیک میلنگ کے ذریعے
پیسے بٹورنے کا دھندہ بھی عروج پر پہنچ گیا ہے۔ ملتان سمیت جنوبی پنجاب خاص طور پر بلیک میل کرنیوالے گروہوں کے نرغے میں آچکا ہے۔ جعلی اکاؤنٹ بنا کر جعلی تصاویر مختلف اخبارات اور چینلز کے لوگو لگا کر لوگوں کو بلیک میل کیا جا رہا ہے۔ سائبرکرائم کی روک تھام کیلئے متعدد قانون بنائے گئے مگر نتیجہ صفر ہی رہا۔ آخر کار (NCCIA) نیشنل سائبر کرائم انوسٹی گیشن ایجنسی تشکیل دی گئی۔ پکڑ دھکڑ شروع ہوگئی۔ ڈکی بھائی کی گرفتاری کے بعد رجب بٹ سمیت ٹک ٹاکروں کے گرد گھیرا تنگ ہونے لگا۔ متعدد ملک چھوڑ گئے ،کچھ روپوش ہو گئے، بعد میں معلوم ہوا کہ کارروائی کرنے والے ہی کرپشن پر پکڑے گئے۔ اب حکومت سوشل میڈیا کے غلط استعمال پر ایک اور نیا محکمہ بنانے کی تیاری کر رہی ہے۔ پارلیمنٹ کی ایک ذیلی کمیٹی نے سائبر کرائم سے متعلق پروٹیکشن آف سائبر کرائم بل 2014 کی منظوری دی تھی۔ مگر اس پر عملدرآمد کو یقینی نہیں بنایا جا سکا۔ سائبر کرائم سے نمٹنے کیلئے متعدد بل قومی اسمبلی میں بھی زیر غور ہیں۔ دیہی علاقوں میں سائبر کرائم تیزی سے پھیل رہا ہے۔ قانون سے نا آشنا اور کم پڑھے لکھے لوگ زیادہ لٹنے میں مصروف ہیں۔ بہت سے لوگوں کو تو پتہ ہی نہیں کہ ان کے نام سے اکاونٹ بنے ہوئے ہیں۔ شہریوں کی رائے یہ ہے کہ سائبر کرائم کو روکنے کیلئے قوانین بنانے کے ساتھ تکنیکی مہارت استعمال کی جائے ۔اس مقصد کیلئے ایک علیحدہ ادارہ قائم ہونا چاہیے تا کہ سائبر کرائم پر قابو پایا جا سکے۔ ایف آئی اے کے محکمہ کو اس قسم کے کیسوں کو ڈیل کرنے کی علیحدہ سے ذمہ داری دی گئی ہے۔ اسلام آباد اور کراچی میں با قاہدہ ہیلپ لائن 9911 شروع ہے مگر سائبر کرائم کو روکنے کیلئے مزید اقدامات کی ضرورت ہے۔
سائبر کرائم