کراچی میں اندھی گولیوں سے خاتون سمیت 3 افراد زخمی

کراچی(این این آئی) شہر کے مختلف علاقوں میں فائرنگ کے واقعات کے دوران اندھی گولیاں لگنے سے خاتون سمیت 3 افراد زخمی ہوگئے، جنہیں طبی امداد کے لیے عباسی شہید ہسپتال منتقل کردیا گیا۔ پولیس کے مطابق خواجہ اجمیر نگری کے علاقے نارتھ کراچی سیکٹر سی 45 میں 21 سالہ شہویز ولد خالد محمود نامعلوم سمت سے آنے والی گولی لگنے سے زخمی ہوگیا۔ واقعے کے بعد زخمی کو فوری طور پر ہسپتال منتقل کیا گیا۔ دوسرا واقعہ لیاری کی میمن سوسائٹی میں پیش آیا جہاں 27 سالہ سبطین ولد خادم حسین اندھی گولی لگنے سے زخمی ہوگیا۔ پولیس کے مطابق اورنگی ٹاؤن کے علاقے نورانی محلے کی گلی نمبر 3 میں 60 سالہ سردار بی بی زوجہ محمد ریاض بھی اندھی گولی کا نشانہ بن کر زخمی ہوگئیں۔