سارہ شریف کے دادا کو پانچوں بچوں کی سرپرستی مل گئی

لندن (این این آئی) والدین کے ہاتھوں قتل ہونے والی 10 سالہ سارہ شریف کے دادا کو پانچوں بچوں کی سرپرستی مل گئی۔ غیر ملکی میڈیا کے مطابق سارہ شریف کے دادا محمد شریف نے پاکستانی عدالت کے فیصلے پر اطمینان کا اظہار کرتے ہوئے کہاکہ اب بچوں کو بہترین تعلیم اور دیکھ بھال فراہم کرنا میری ذمے داری ہے۔ سارہ شریف کے قتل کے بعد اس کے بہن بھائی اگست 2023 میں پاکستان منتقل ہو گئے تھے۔ واضح رہے سارہ کی تشدد زدہ لاش 10 اگست 2023 کو ووکنگ میں اس کے گھر سے ملی تھی۔ بچی سارہ کے قتل کے جرم میں والد عرفان کو 40 برس، سوتیلی ماں کو33 برس قید کی سزا سنائی گئی تھی جبکہ چچا فیصل کو موت کا سبب بننے یا اسے روکنے میں ناکامی پر16 برس قید کی سزا ہوئی تھی۔