گجرات: ایشیا کے امیر ترین شخص بھارتی بزنس ٹائیکون مکیش امبانی کے سب سے چھوٹے بیٹے اننت امبانی کی پری ویڈنگ تقریبات میں بالی ووڈ اسٹارز نے پاکستانی ڈیزائنرز کے ملبوسات زیب تن کیے۔
حال ہی میں نیتا امبانی اور مکیش امبانی نے اپنے سب سے چھوٹے بیٹے اننت امبانی اور اُن کی منگیتر رادھیکا مرچنٹ کے لیے تین روزہ پری ویڈنگ تقریبات کا انعقاد کیا تھا، یہ تمام تقریبات بھارتی ریاست گجرات کے شہر جام نگر میں منعقد ہوئی تھیں۔
اننت امبانی اور رادھیکا مرچنٹ کی پری ویڈنگ تقریبات میں دنیا بھر کی چند بااثر شخصیات اور نامور بالی ووڈ ستاروں نے شرکت کی تھی جن میں سماجی، سیاست، کاروباری، شوبز اور کھیلوں کی دنیا کی معروف شخصیات شامل تھیں۔
بھارتی میڈیا کے مطابق پری ویڈنگ تقریبات میں شرکت کرنے والے ہر شخص کو ایک ڈریس کوڈ دیا گیا تھا اور مشہور شخصیات نے اس کے مطابق لباس زیب تن کیا تھا، زیادہ تر شرکاء کو بھارتی ڈیزائنرز کے ملبوسات میں دیکھا گیا لیکن ان میں سے چند بالی ووڈ اسٹارز ایسے بھی تھے جنہوں نے اننت امبانی کی پری ویڈنگ تقریبات کے لیے پاکستانی ذیزائنرز کے ملبوسات کو ترجیح دی۔
بالی ووڈ اسٹار رنبیر کپور نے اننت امبانی اور رادھیکا مرچنٹ کی کاک ٹیل پارٹی کے لیے معروف پاکستانی ڈیزائنر فراز منان کے لباس کا انتخاب کیا۔
اننت امبانی کی پری ویڈنگ تقریبات میں ارجن کپور بھی اپنے دوست رنبیر کپور سے متاثر نظر آئے اور اُنہوں نے بھی پاکستانی ڈیزائنر فراز منان کا تیارکردہ لباس زیب تن کیا۔
اسی طرح بالی ووڈ اداکار شاہد کپور کی اہلیہ میرا راجپوت بھی اننت امبانی اور رادھیکا مرچنٹ کی پری ویڈنگ تقریبات میں فراز منان کے لباس میں ملبوس نظر آئیں۔
دوسری جانب ماضی کے معروف بالی ووڈ اداکار انیل کپور کی بیٹی سونم کپور نے بھی اس تقریب کے لیے پاکستانی ڈیزائنر حسین ریہر کا لباس زیب تن کیا۔
واضح رہے کہ 28 سالہ اننت امبانی رواں سال جولائی میں رادھیکا مرچنٹ سے شادی کریں گے، اس جوڑی کی ‘پری ویڈنگ’ تقریبات میں فیس بک کے بانی مارک زکربرگ، امریکی گلوکارہ ریانا، مائیکروسافٹ کے شریک بانی بل گیٹس، الفابیٹ کے چیف ایگزیکٹو سندر پچائی، بلیک راک کے شریک بانی لیری فنک، آسٹریلیا کے سابق وزیراعظم کیون رڈ اور ایوانکا ٹرمپ، کینیڈا کے سابق وزیر اعظم اسٹیفن ہارپر، کرکٹرز مہندر سنگھ دھونی اور ڈوین براوو نے بطورِ مہمان شرکت کی تھی۔
ان کے علاوہ شاہ رخ خان، سلمان خان، عامر خان، بچن فیملی، کپور خاندان، کترینہ کیف، رجنی کانت، رانی مکھرجی، بھارتی میوزک اسٹارز سمیت دیگر معروف بھارتی شخصیات نے بھی شرکت کی تھی۔
