پاکستان کرکٹ بورڈ (PCB) اور پاکستان سپر لیگ کی تمام 8 فرنچائزز کے مالکان کے درمیان پی ایس ایل 2027 کو موجودہ اپریل، مئی ونڈو کے بجائے جنوری میں کرانے کے حوالے سے مشاورت ہوئی ہے۔ تاہم اس حوالے سے تاحال کوئی حتمی فیصلہ نہیں کیا گیا۔
ذرائع کے مطابق پی ایس ایل کے میڈیا رائٹس رکھنے والی کمپنی والی ٹیکنالوجیز (Walee Technologies) نے لیگ کو جنوری میں منتقل کرنے کی تجویز دی ہے۔ کمپنی کا مؤقف ہے کہ رمضان کے بعد اپریل، مئی میں لیگ کے انعقاد سے اشتہارات اور کمرشل آمدنی پر اثر پڑتا ہے، جبکہ جنوری کی ونڈو زیادہ بہتر تجارتی نتائج دے سکتی ہے۔
رپورٹ کے مطابق فرنچائز مالکان جنوری کی تجویز پر مکمل طور پر متفق نہیں اور اپریل کی ونڈو برقرار رکھنے کے حق میں ہیں۔ اس معاملے پر PCB اور فرنچائزز کے درمیان مزید مشاورت جاری ہے۔
پی ایس ایل کے ابتدائی 9 ایڈیشنز 2016 سے 2024 تک فروری، مارچ میں منعقد ہوئے تھے، تاہم 2025 اور 2026 میں آئی سی سی چیمپئنز ٹرافی اور ٹی20 ورلڈ کپ سمیت بین الاقوامی کرکٹ کے مصروف شیڈول کے باعث لیگ کو اپریل، مئی میں منتقل کیا گیا۔
جنوری میں پی ایس ایل کرانے کی صورت میں کچھ مشکلات بھی سامنے آسکتی ہیں۔ جنوبی افریقہ کی SA20 اور آسٹریلیا کی بگ بیش لیگ (BBL) بھی اسی عرصے میں جاری ہوتی ہیں، جس کے باعث غیرملکی کھلاڑیوں کی دستیابی ایک بڑا مسئلہ بن سکتی ہے۔
اس کے علاوہ پنجاب کے شہروں لاہور، ملتان اور راولپنڈی میں جنوری کے دوران سرد موسم اور دھند بھی میچز کے انعقاد اور براڈکاسٹنگ کے لیے چیلنج بن سکتی ہے۔
فی الحال پی ایس ایل 2027 کی تاریخوں کا حتمی اعلان نہیں کیا گیا اور جنوری یا فروری کی ونڈو پر غور جاری ہے۔
