پاکستان میں غربت کی شرح 29 فیصد تک پہنچ گئی، روزگار کی فراہمی بڑا چیلنج بن گئی

کراچی (این این آئی) پاکستان میں غربت کی شرح 2019ء کے 22 فیصد سے بڑھ کر 2025ء میں 29 فیصد تک پہنچ گئی، جبکہ ورلڈ بینک نے ملک میں ہر سال 36 لاکھ افراد کے لیے روزگار کے مواقع پیدا کرنے کی ضرورت اور اس ہدف کے حصول میں ناکامی کے خدشات کی نشاندہی کی ہے۔ معاشی ماہرین کے مطابق محدود معاشی ترقی، فی کس آمدن میں معمولی اضافے، مہنگائی اور روزگار کے ناکافی مواقع کے باعث عوام کو معاشی مشکلات کا سامنا ہے، جبکہ پائیدار ترقی کے لیے فوری اور مؤثر اصلاحات ناگزیر ہوچکی ہیں۔ ورلڈ بینک کی پاکستان کی معیشت سے متعلق رپورٹ کے حوالے سے سامنے آنے والے اعدادو شمار کے مطابق گزشتہ چند برسوں کے دوران غربت کی شرح میں نمایاں اضافہ ہوا ہے۔ رپورٹ میں معاشی ترقی کی رفتار، آمدن میں اضافے اور روزگار کے مواقع کے حوالے سے درپیش چیلنجز کی بھی نشاندہی کی گئی ہے۔