بنگلا دیش کی سابقہ وزیر اعظم شیخ حسینہ واجد کے بھارت روانہ ہونے کے بعد ضلع شیر پور کی جیل سے 500 سے زائد قیدی بھی فرار ہوگئے۔
غیر ملکی میڈیا رپورٹس کے مطابق گزشتہ روز جب سابقہ وزیر اعظم نے استعفیٰ دینے کے بعد راہ فرار اختیار کی تو ملک میں افراتفری کی صورتحال کے دوران موقع سے فائدہ اُٹھاتے ہوئے ضلع شیر پور کی جیل کے 500 قیدی جیل توڑ کر فرار ہونے میں کامیاب ہوگئے۔
میڈیا کے مطابق فرار ہونے والے ان قیدیوں میں بیشتر مسلح تھے جبکہ بنگلا دیشی حکام کے مطابق ان قیدیوں میں 20 کی شناخت ممکنہ دہشت گردی سے وابستگی کے طور پر کی گئی ہے۔
ممکنہ دہشت گردی کے پیش نظر بارڈر سیکیورٹی فورس (بی ایس ایف) نے سرحد پر اپنی تعیناتی بڑھا دی ہے۔
بنگلا دیشی میڈیا کے مطابق لاٹھیوں سے لیس نامعلوم افراد نے ضلع شیرپور کی مقامی جیل میں گھس کر 500 سے زائد قیدیوں کو چھڑا لیا جبکہ کم از کم 6 پولیس اسٹیشنوں میں توڑ پھوڑ کر آگ لگا دی گئی۔
میڈیا کے مطابق ان پولیس اسٹیشنوں سے اسلحے سمیت دیگر سامان لوٹے جانے کی خبریں بھی سامنے آ رہی ہیں۔
ایک رپورٹ کے مطابق مشتعل ہجوم کی جانب سے عوامی لیگ کے رہنماؤں و کارکنان کے گھروں اور افسران کو بھی نشانہ بنایا جا رہا ہے۔
