ممبئی: بالی ووڈ کے مشہور فلم میکر نکھل ایڈوانی کا کہنا ہے کہ اداکار سلمان خان کی فلمیں 300 کروڑ سے زیادہ نہ کمائیں تو ان کو برا لگتا ہے۔
میگا اسٹار سلمان خان کے ساتھ فلم ‘ سلام عشق’ اور ‘ہیرو’ میں کام کرنے والے فلم میکر نکھل ایڈوانی نے ایک انٹرویو میں کہا کہ سلمان خان کے ساتھ کام کرتے ہوئے ہر وقت باکس آفس کا پریشر رہتا ہے۔ سلمان خان کی کوئی فلم 300 کروڑ روپے سے کم کمائے توانہیں برا لگتا ہے۔
فلم میکر کا مزید کہنا تھا کہ یہی وجہ ہے کہ میں نے سلمان خان کے ساتھ کم کام کیا ہے کیونکہ میں باکس آفس کا بوجھ لیے بغیر رات کو سکون کی نیند سونا چاہتا ہوں۔ سلمان خان میرے دوست ، میرے مسیحا ہیں تاہم میں اپنی فلم اپنی مرضی سے بنانا چاہتا ہوں۔ سلمان خان ایسے شخص ہیں جن سے کوئی بھی مشکل اور مصیبت کے وقت میں رابطہ کرسکتا ہے۔ اگر وہ فلم کی شوٹنگ میں بھی مصروف ہیں اور کوئی ایمرجنسی بتائے تو وہ شوٹنگ چھوڑ کر مدد کو چلے جاتے ہیں۔
