بالی وڈ اسٹارز حنا خان، کارتک آریان، ترپتی ڈمری، سونالی بیندرے سمیت کئی دیگر مشہور شخصیات نے حال ہی میں ‘نمو بھارت ایونٹ‘ میں مشہور ڈیزائنر منیش ملہوترا کے لیے ریمپ پر واک کی۔
‘نمو بھارت ایونٹ‘ تقریب کی کئی ویڈیوز اور تصاویر سوشل میڈیا پر گردش کر رہی ہیں تاہم اداکارہ حنا خان کی کارتک آریان سے کی جانے والی گریٹنگ کے دوران کیمرے کی آنکھ میں قید ہونے والی ویڈیو فوٹو اینڈ ویڈیو شیئرنگ ایپ انسٹاگرام پر وائرل ہوگئی۔
انسٹاگرام پر وائرل ہونے والی ویڈیو میں دیکھاجاسکتا ہے کہ کینسر سے جنگ لڑتی بھارتی شوبز انڈسٹری کی معروف اداکارہ حنا خان اسٹیج پر اداکار کارتک آریان سےہائے ہیلو کرتے ہوئے اپنا توازن کھو بیٹھی ہیں۔
اداکارہ حنا خان جیسے ہی کارتک سے گلے ملنے کے لیے آگے بڑھیں، اچانک توازن کھونے کی وجہ سے لڑکھڑاگئی تاہم اس موقع پر حاضر دماغی دکھاتے ہوئے کارتک آریان نے ہندی فلموں کے ہیرو کی طرح فورا حنا کو تھام لیا۔
ویڈیو کے کمنٹ سیکشن میں مداحوں کی جانب سے کارتک آریان کو رئیل لائف ہیرو کا خطاب دیدیا گیا۔
پوسٹ پر تبصرہ کرتے ہوئے مداحوں نے چندو چیمپئن اسٹار کارتک آریان کو شاہ رُخ خان کا خطاب دے دیا ۔
مداحوں کا کہنا تھا کہ ‘بالی وڈ کے آئیکن اسٹار کنگ خان بھی اپنے سگنیچر پوز میں باہیں کھول کر رومانس کرتے نظر آتے ہیں تاہم کارتک نے باہوں کو رومانس نہیں بلکہ ریسکیو کیلئے استعمال کیا کو کہ بہت دل آویز لمحہ تھا‘۔
واضح رہے کہ مشہور ٹیلی ویژن شو ‘یہ رشتہ کیا کہلاتا ہے‘ میں اکشرا کے کردار سے شہرت حاصل کرنے والی ادکارہ حنا خان نے مداحوں کو حال ہی میں آگاہ کیا کہ انہیں کینسر کا مرض لاحق ہوگیا ہے۔
چھاتی کے کینسر کی تشخیص کے بعد سے ہی اداکارہ نے اپنی انسٹاگرام پوسٹ کے ذریعے اپڈیٹس دیتے ہوئے اس نئے لیکن مشکل سفر میں مداحوں کو اپنے ساتھ رکھا ہوا ہے۔
