چترال (03 جون 2026): پری شندور پولو ٹورنامنٹ 2026 شان دار مقابلوں کے بعد اختتام پذیر ہو گیا، ٹورنامنٹ کے فائنل میچ میں چترال اسکاؤٹس اے نے بہترین کھیل کا مظاہرہ کرتے ہوئے ڈسٹرکٹ ایڈمنسٹریشن چترال لیویز اے کو 1 کے مقابلے میں 4 گول سے شکست دے کر ٹائٹل اپنے نام کر لیا۔
فائنل میچ میں دونوں ٹیموں کے درمیان سنسنی خیز مقابلہ دیکھنے میں آیا، تاہم چترال اسکاؤٹس اے نے عمدہ ٹیم ورک اور جارحانہ کھیل کی بدولت کام یابی حاصل کی۔
ٹورنامنٹ کے اختتام پر چترال اسکاؤٹس کے ٹیم کمانڈر صوبیدار میجر اسرار ولی خان کو مین آف دی ٹورنامنٹ جب کہ حوالدار آصف حسین کو مین آف دی میچ قرار دیا گیا۔ ڈسٹرکٹ ایڈمنسٹریشن چترال لیویز کے ٹیم کپتان اظہار علی خان کے گھوڑے نے بیسٹ ہارس کا ایوارڈ حاصل کیا۔
فاتح ٹیم کے لیے 2 لاکھ روپے، 30 ہزار تماشائی
فائنل میچ کے مہمانِ خصوصی کمانڈنٹ چترال اسکاؤٹس کرنل ارسلان تھے، جنھوں نے کامیاب اور نمایاں کارکردگی دکھانے والے کھلاڑیوں میں ٹرافیاں، انعامات اور اسناد تقسیم کیں۔ اس موقع پر انھوں نے فاتح ٹیم کے لیے 2 لاکھ روپے جب کہ رنر اپ ٹیم کے لیے ایک لاکھ روپے نقد انعام کا اعلان بھی کیا۔
پری شندور پولو ٹورنامنٹ کے فائنل میچ کو دیکھنے کے لیے چترال کے مختلف علاقوں کے علاوہ گلگت بلتستان، ملک کے دیگر شہروں اور بیرونِ ملک سے آنے والے فری اسٹائل پولو کے ہزاروں شائقین نے شرکت کی۔ ایک اندازے کے مطابق تقریباً 30 ہزار تماشائیوں نے فائنل میچ دیکھا اور کھلاڑیوں کی بھرپور حوصلہ افزائی کی۔ شائقین پولو نے ٹورنامنٹ کے کامیاب انعقاد کو سراہتے ہوئے اسے خطے میں کھیلوں کے فروغ اور سیاحت کے لیے اہم قرار دیا۔
پولو چترال کی ثقافت
مہمان خصوصی اور ڈپٹی کمشنر لوئر چترال کا کہنا ہے کہ چترال کے لوگ شاہانہ مزاج اور بلند حوصلوں کے مالک ہیں۔ مہنگائی کے اس دور میں بھی وہ اپنے گھوڑوں کی پرورش اور دیکھ بھال پر خطیر اخراجات برداشت کرتے ہوئے اپنی روایتی کھیل پولو سے والہانہ محبت کا ثبوت دے رہے ہیں۔
پولو صرف ایک کھیل نہیں بلکہ چترال کی ثقافت، روایات اور شناخت کا اہم حصہ ہے۔ یہی وجہ ہے کہ مقامی کھلاڑی اور شائقین ہر قسم کے معاشی چیلنجز کے باوجود اس تاریخی ورثے کو زندہ رکھنے کے لیے بھرپور کردار ادا کر رہے ہیں۔ گھوڑوں کی تربیت، خوراک اور دیکھ بھال پر آنے والے اخراجات کے باوجود پولو کے میدان آباد ہیں، جو چترالی عوام کی اپنی ثقافت اور روایات سے گہری وابستگی کی عکاسی کرتے ہیں۔
پیراگلائیڈنگ
پری شندور پولو ٹورنامنٹ 2026 کے فائنل میچ کو مزید یادگار اور پُررونق بنانے کے لیے چترال کے تاریخی پولو گراؤنڈ میں پیراگلائیڈنگ کا شان دار مظاہرہ کیا گیا۔ رنگا رنگ فضائی کرتبوں نے شائقین کی بھرپور توجہ حاصل کی اور حاضرین نے اس منفرد تفریحی پروگرام کو بے حد سراہا۔
پیراگلائیڈرز نے آسمان کی بلندیوں میں مہارت کا مظاہرہ کرتے ہوئے مختلف دل کش کرتب پیش کیے، جس سے میدان میں موجود تماشائیوں کا جوش و خروش دیدنی تھا۔ فضائی مظاہرے نے نہ صرف فائنل میچ کی رونق میں اضافہ کیا بلکہ پری شندور کے خوب صورت قدرتی مناظر کو بھی مزید دل کش بنا دیا۔
شائقین نے اس اقدام کو ٹورنامنٹ کا ایک یادگار حصہ قرار دیتے ہوئے انتظامیہ کی کاوشوں کو سراہا۔ پیراگلائیڈنگ کے اس شان دار مظاہرے نے کھیلوں اور سیاحت کے فروغ کے حوالے سے چترال کی مثبت اور پرکشش تصویر اجاگر کی۔
