وفاقی وزیر خزانہ محمد اورنگزیب نے کہا ہے کہ پانڈا بانڈ کے اجرا کے عمل میں ایشین انفرا اسٹرکچر انوسٹمنٹ بینک کی بطور اینکر شمولیت سے مارکیٹ میں بہت اچھا تاثر جائے گا۔
وفاقی وزارت خزانہ کے اعلامیے کے مطابق وزیر خزانہ محمد اورنگزیب نے واشنگٹن میں ایشین انفرااسٹرکچر انوسٹمنٹ بینک کے صدر جن لیکون سے ملاقات کی اور اس دوران ایشین انفرااسٹرکچر انوسٹمنٹ بینک کی جزوی کریڈٹ گارنٹی کے ساتھ پانڈا بانڈ کے اجرا کے امکانات پر تبادلہ خیال کیا گیا۔
محمد اورنگزیب نے پاکستان کے لیے بینک کی فراہم کردہ مدد کا اعتراف کیا اور 2022 کے سیلاب کی تباہ کاریوں سے نمٹنے کے لیے بینک کی امداد کو سراہا اور کہا کہ پانڈا بانڈ کے اجرا کے عمل میں ایشین انفرااسٹرکچر انوسٹمنٹ بینک کی بطور اینکر شمولیت سے مارکیٹ میں بہت اچھا تاثر جائے گا۔
ملاقات کے دوران وزیر خزانہ نے اپنے گزشتہ دورہ چین اور پیپلز بینک آف چائنا کی انتظامیہ کے ساتھ بات چیت کا ذکر کیا اور فنانسنگ بیس کو متنوع بنانے کے حوالے سے حکومت پاکستان کی خواہش کا اظہار کیا۔
انہوں نے اس حوالے سے ایک نو ڈِیل روڈ شو اور بعد ازاں ڈیل روڈ شو کے اہتمام کے آپشن پر بھی تبادلہ خیال کیا اور پاکستان میں اے آئی آئی بی کے منصوبوں کے پورٹ فولیو کی پیش رفت پر اطمینان کا اظہار کیا اور ملک میں جاری منصوبوں کے لیے اے آئی آئی بی کی جانب سے مالی وسائل کی فراہمی بہتر بنانے کی کوششوں کو قابل اطمینان قرار دیا۔
محمد اورنگزیب نے انفرا اسٹرکچر کی ترقی کے لیے این 5 (جی ٹی روڈ) کی تعمیر نو کے منصوبے میں اے آئی آئی بی کو سرمایہ کاری کی دعوت دی اور موسمیاتی تبدیلیوں کے اثرات اور آفات سے نمٹنے کی تیاریوں کے لیے قرض پروگرام کے معاملے میں مدد کی خواہش کا اظہار کیا۔
اس موقع پر سینیٹر اورنگزیب نے بینک کے نائب صدر آپریشنز کے آئندہ دورہ پاکستان کا خیر مقدم کیا، نائب صدر کے دورہ پاکستان کے دوران باہمی دلچسپی کے امور کے علاوہ جاری منصوبوں کا جائزہ اور مستقبل کی سرمایہ کاری پر غور وخوض ہو گا۔
وزیر خزانہ محمد اورنگزیب نے ایشین انفرا اسٹرکچر انوسٹمنٹ بینکنگ کے صدر جن لیکون کو دورہ پاکستان کی دعوت بھی دی، جن لیکون نے دورہ پاکستان کی دعوت قبول کرتے ہوئے بعد میں باہمی طور پر طے کردہ مناسب تاریخوں پر پاکستان کا دورہ کرنے کی ہانمی بھر لی ہے۔
