فضائی آلودگی میں بھارتی شہر دہلی 601 اسکور سے پہلے نمبر پر آگیا جبکہ 247 اسکور سے لاہور دوسرے اور 187 اسکور سے مصر کا دارالحکومت قاہرہ تیسرے نمبر پر ہے۔
مشرقی ہواؤں کی تبدیلی اور مصنوعی بارش سے لاہور سمیت ملحقہ علاقوں میں اسموگ انڈیکس میں کمی آگئی ہے۔
سینیئر صوبائی وزیر مریم اورنگزیب کا کہنا تھا کہ جمعے کو کیے جانے والے اقدامات اور تمام اداروں کے کردار سے پنجاب کو اسموگ سے نجات دلانے میں مدد ملے گی، ان شاءاللہ۔
پاکستانی پنجاب میں ’’ڈی ٹاکس پنجاب مہم‘‘ سے راولپنڈی سمیت تمام علاقوں میں اسموگ کی صورت حال میں بہتری ہوگی۔
لاہور میں اسموگ سے بچاؤ کے لیے آپریشن پوری قوت سے جاری ہے۔ شہر میں دھواں پھیلانے والی بڑی گاڑیوں اور ٹرکوں کے داخلے پر بدستور پابندی عائد ہے۔ اسموگ سے بچاؤ کے لیے مشترکہ آپریشن ٹیم میں محکمہ تحفظ ماحول، ریجنل ٹرانسپورٹ اتھارٹی اور ٹریفک پولیس کے حکام شامل ہیں۔
اسموگ سے بچاﺅ کے لیے بڑی گاڑیوں کے لاہور میں داخلے پر سخت پابندی کا سلسلہ جاری ہے۔ 103 بڑی گاڑیوں کو لاہور میں داخل ہونے سے روک دیا گیا، تعمیراتی سامان لے جانے والی مال بردار گاڑیوں کی سخت جانچ پڑتال کی جا رہی ہے۔
لاہور میں انٹری پوائنٹس پر گاڑیوں کی پڑتال کا عمل 24 گھنٹے بلا تعطل جاری ہے، آپریشن کا مقصد بڑی اور زیادہ دھواں پھیلانے والی گاڑیوں کو لاہور میں آنے سے روکنا ہے۔
مشترکہ آپریشن ٹیم کے مطابق ڈمپر اور بڑی گاڑیوں کے داخلے پر پابندی سے اسموگ انڈیکس میں کمی لانے میں مدد مل رہی ہے۔ تعمیرات پر پابندی اور تعمیراتی سامان ڈھانپ کر منتقل کرنے کی ایس او پی پر بھی سخت عمل درآمد جاری ہے، کئی گاڑیوں کو جرمانے کیے گئے۔
سینئیر صوبائی وزیر مریم اورنگزیب کا بیان میں کہنا تھا کہ ہواﺅں میں تبدیلی سے پنجاب کے علاقوں میں اسموگ میں کمی آئی، ہمیں اپنے علاقوں میں اسموگ پھیلانے والے ذرائع کے تدارک کے بھرپور کوششیں جاری رکھنی ہیں اور اسموگ سے بچاﺅ کے لیے ہر شہری کا تعاون لازمی ہے۔
مریم اورنگزیب کا کہنا تھا کہ فیلڈ میں موجود ای پی اے، پولیس، ٹرانسپورٹ اور پنجاب حکومت کے تمام اداروں کی کاوشیں قابل تحسین ہیں، اسموگ کے خاتمے کے لیے کردار ادا کرنے والے ہر ادارے کا افسر اور عملے کا فرد ہیرو ہے، مشل حالات میں مشکل فیصلے عوام کی زندگیوں اور صحت کے تحفظ کے لیے کر رہے ہیں۔ انہوں نے اپیل کی کہ غیر ضروری گھروں سے نہ نکلیں اور ماسک پہنیں۔
