کراچی دھرنوں کا شہر بن گیا ہے، مذہبی جماعت کے 10 مقامات پر گزشتہ کئی روز سے جاری دھرنے ابھی ختم بھی نہیں ہوئے کہ ایک اور مذہبی جماعت نے آج 60 مقامات پر دھرنے دینے کا اعلان کر دیا ہے۔
کراچی میں 10 مختلف مقامات پر پہلے ہی گزشتہ کئی روز سے ایک مذہبی جماعت کے دھرنے جاری ہیں جس کی وجہ سے ٹریفک نظام بری طرح متاثر ہے اور شہریوں کو مشکلات کا سامنا کرنا پڑ رہا ہے۔
مرکزی دھرنا ایم اے جناح روڈ پر نمائش چورنگی کے مقام پر دیا گیا ہے۔ اس کے علاوہ دیگر دھرنے کامران چورنگی، جوہر موڑ، ابو الحسن اصفہانی روڈ، فائیو اسٹار چورنگی، یونیورسٹی روڈ (میٹرو شاپنگ سینٹر سے نیپا تک)، شمس الدین عظیمی روڈ، انچولی (شاہراہ پاکستان)، نواب صدیق علی خان روڈ (ناظم آباد نمبر 1 سے ناظم آباد نمبر 2)، اور شاہراہ پاکستان (عائشہ منزل چورنگی) پر جاری ہیں۔
ٹریفک پولیس کے مطابق دھرنوں کے اطراف کئی سڑکیں بند ہیں، جبکہ کچھ سڑکوں پر ٹریفک ایک ٹریک پر رواں دواں ہے، جبکہ متبادل راستوں پر ٹریفک کا دباؤ بڑھ گیا ہے۔
شہریوں سے اپیل کی گئی ہے کہ وہ متاثرہ علاقوں میں جانے سے گریز کریں یا متبادل راستوں کا استعمال کریں۔
دوسری جانب حکومت سندھ اور مذہبی جماعت کے درمیان مذاکرات کا سلسلہ جاری ہے۔ حکومتی وفد نے دھرنوں کو ایک مقام پر یکجا کرنے کی درخواست کی ہے، جس پر مذہبی جماعت کے ترجمان کا کہنا ہے کہ وہ مشاورت کے بعد حکومتی وفد کو آگاہ کریں گے۔
جبکہ ایک اور مذہبی جماعت نے کراچی میں آج 60 مقامات پر دھرنے دینے کا اعلان کیا ہے، جس کے باعث ٹریفک اور شہریوں کی مشکلات میں اضافے کا خدشہ ہے۔
ٹریفک پولیس نے مسافروں سے اپیل کی ہے کہ وہ تحمل کا مظاہرہ کریں اور رہنمائی کے لیے ٹریفک ہیلپ لائن 1915 پر رابطہ کریں۔ متاثرہ علاقوں میں جانے سے گریز کریں اور ضروری صورت میں متبادل راستے اختیار کریں۔
