لاہور (خبریں ڈیجیٹل ) صوبائی وزیر برائے اقلیتی و انسانی حقوق رمیش سنگھ اروڑا نے خبریں ڈیجیٹل کے پوڈ کاسٹ’ فرنٹ فٹ’ میںگفتگو کرتے ہوئے کہا ہے کہ پاکستان نے رات کے اندھیرے میں حملہ کرنے والے بھارت کے غرور کو خاک میں ملا دیا ،آج کا پاکستان ستر کی دہائی والا نہیںہے ،ایٹمی طاقت ہے ،ناقابل تسخیر ہے لیکن بھارت کی اس بات کی سمجھ نہیں آ رہی اسی لئے وہ بار بار چڑھائی کرنے کی کوشش کرتا ہے ۔پاک فوج خصوصا ائیر فورس کے شاہینوں کو سلام پیش کرتا ہوں جنہوں نے انتہائی دلیری کا مظاہرہ کرتے ہوئے بھارت کے تکبر کو دھول چٹا دی ۔پہلگام میں فالس فلیگ آپریشن کیا گیا جس کے پیچھے وہی مائینڈ سیٹ ہے جس نے آج تک پاکستان کو تسلیم ہی نہیں کیا ۔پہلگام واقعہ سے پہلے پاکستان نے 7ہزار سکھ یاتریوں کو ویزے ایشو کیے جبکہ بھارت ایسا نہیں چاہتا تھا ۔فالس فلیگ آپریشن کا مقصد پاکستان کو دنیا میں بدنام کرنا تھا جس کے بعد جارحیت کی اور پانی بند کر دیا ۔پاکستانی میڈیا کو خراج تحسین پیش کرتا ہوں جس نے بھارتی میڈیا کا سارا پروپیگنڈا ڈھیر کر دیا ۔بھارت نے پاکستان کے شہری علاقوں میں حملے کیے اور معصوم شہریوں کا شہید کیا ،اس سے قبل اس نے سکھوں کا قتل عام کیا ،گجرات میں مسلمانوں کو قتل کیا ،کشمیریوں کا قتل عام کیا ،مجھے اس پر دنیا کی خاموشی پر گلہ ہے ۔عالمی دنیا پاکستان کے بارے میں منفی رائے رکھتی ہے حالانکہ ہم صرف امن کے داعی ہیں اور اس خطے میں جہاں دو ارب لوگ بستے ہیں نہیں چاہتے کہ انسانی جانوں کا ضیاع ہو ۔ہمیں سمجھنا ہو گا کہ مودی سرکار اکیلی بھارت نہیںہے ،وہاں 20کروڑ مسلمان بستے ہیں ،اڑھائی کروڑ سکھ ہیں ،دیگر کمیونیٹیز ہیں ۔پنجاب کا سکھ ڈٹ گیا اور اس نے صاف کہہ دیا کہ پنجاب سے گزر کر حملہ کرنے کی اجازت نہیں دینگے ،جنگ لڑنے کا اتنا ہی شوق ہے تو گجرات یا راجھستان سے گزر کر جائیں ،یہ بھارت کیلئے بڑا جھٹکا تھا جس نے اسے گھٹنے ٹیکنے پر مجبور کیا ۔دنیا بھر میں موجود سکھوں نے پاکستان کے حق میں آواز اٹھائی ۔سکھ اور پاکستان کا ناخن اور گوشت کا رشتہ ہے ۔پاکستان کی حمایت کرنے پر تمام سکھ کمیونٹی کا شکر گزار ہوں ۔بھارت کو 6-0ہمیشہ یاد رہے گا ،کہاں گیا رافیل ،کہاں گئی ان کی ڈیجیٹل ٹیکنالوجی ،بڑی بڑھکیں مارتے تھے ،اب کہاں غائب ہیں ۔بھارتی عوام کو مودی سے پوچھنا چاہیے کہ کیوں دنیا بھر میں بے عزتی کرائی ۔پاکستان کو ہر وقت بھارت سے چوکنا رہنے کی ضرورت ہے ۔نواز شریف خاموش نہیں ہیں ،بعض کارڈ وقت پر شو کرنا ہوتے ہیں ۔حکومت اور فوج ایک پیج پر ہیں ۔پاکستان کو معاشی طور پر مضبوط ہونے کی ضرورت ہے ۔وزیر اعلیٰ مریم نواز اقلیتوں کے بارے میںزبردست ویژن رکھتی ہیں ،اسی لیے انہوں نے مجھے پاورز دی ہیں ،بجٹ کو اڑھائی سو فیصد بڑھا دیا ہے کہ اقلیتوں کی خدمت کرو ۔میں نے ورلڈ بنک کی مدد سے پانچ سالہ پلان بنایا ہے ،پلان یہ ہے کہ کیسے غریب اقلیتوں کو پائوں پر کھڑا کرنا ہے ،انہیں جدید ٹیکنالوجی کے مطابق تعلیم دے رہے ہیں تا کہ دنیا کے ساتھ رابطہ میں رہ کر اپنا مقام حاصل کریں ۔فافن نے رپورٹ شائع کی ہے جس میںمیرے محکمے کو نمبر ون قرار دیا ہے ۔پاکستان میں انسانی حقوق کے حوالے سے بڑے چیلنجز کا سامنا ہے تاہم حکومت کی پوری کوشش ہے کہ بہتری لائی جائے ،پولیس میں اصلاحات لا رہے ہیں ،قانون سازی کی جا رہی ہے ۔
پاک فضائیہ کے شاہینوں کو سلام ،بھارت کا غرور خاک میں ملا دیا ،رمیش سنگھ اروڑا
