مشیرِ اطلاعات کے پی بیرسٹر سیف کا کہنا ہے کہ بانیٔ پی ٹی آئی نے ملک گیر احتجاج فوری شروع کرنے کی ہدایت جاری کر دی، انہوں نے کہا ہے کہ وزیرِ اعلیٰ اور تمام ذمے داران فوری احتجاجی تحریک کا آغاز کریں۔
مشیرِ اطلاعات خیبر پختونخوا بیرسٹر سیف نے بانیٔ پی ٹی آئی سے ملاقات کے بعد جاری کیے گئے بیان میں کہا ہے کہ بانیٔ پی ٹی آئی نے پارٹی رہنماؤں کے درمیان بیان بازی پر شدید افسوس اور غصے کا اظہار کیا ہے۔
ان کا کہنا ہے کہ بانیٔ پی ٹی آئی کی سخت ہدایات ہیں کہ تمام رہنما ایک دوسرے کے خلاف بیان بازی اور سوشل میڈیا مہم چلانے سے باز رہیں، سوشل میڈیا کو پارٹی کا بیانیہ مضبوط بنانے کے لیے استعمال کریں۔
بیرسٹر سیف نے کہا ہے کہ تمام رہنما احتجاجی تحریک کے لیے متحد اور یکسو ہوں، بانیٔ پی ٹی آئی نے وزیرِ اعلیٰ اور تمام ذمے داران کو احتجاجی تحریک کے سلسلے میں سخت ہدایات جاری کی ہیں۔
انہوں نے کہا ہے کہ بانیٔ پی ٹی آئی سے سینیٹ انتخابات اور احتجاجی تحریک سے متعلق تفصیلی گفتگو ہوئی، انہوں نے سینیٹ کے امیدواروں کی ترجیحی فائنل فہرست فراہم کردی، ثانیہ نشتر کی نشست پر مشال یوسفزئی کے نام کو حتمی شکل دے دی گئی ہے۔
مشیرِ اطلاعات خیبر پختونخوا نے بتایا ہے کہ دیگر امیدواروں میں مراد سعید، فیصل جاوید، مرزا آفریدی اور پیر نور الحق قادری شامل ہیں، جبکہ ٹیکنو کریٹ سیٹ پر اعظم سواتی اور خواتین سیٹ پر روبینہ ناز شامل ہیں۔
ان کا کہنا ہے کہ بانیٔ پی ٹی آئی کو وزیرِ اعلیٰ کے لاہور کے دورے اور احتجاجی سرگرمیوں کے بارے میں بھی علم نہیں تھا، میں نے انہیں وزیرِ اعلیٰ کے لاہور کے دورے اور وہاں ہونے والی احتجاجی سرگرمیوں پر بریفنگ دی ہے۔
بیرسٹر سیف نے بتایا ہے کہ جیل میں بشریٰ بی بی کو بھی ذہنی اذیت دی جارہی ہے، انہیں گندا پانی دیا جا رہا ہے، خوراک میں رکاوٹ ڈالی جا رہی ہے، بشریٰ بی بی کو گزشتہ دنوں کیڑے نے پاؤں پر کاٹا تھا، جس سے وہ ایک ہفتہ بیمار رہیں۔
انہوں نے بتایا ہے کہ تمام تر اذیت کے باوجود بانیٔ پی ٹی آئی اور بشریٰ بی بی کے حوصلے بلند ہیں، بانیٔ پی ٹی آئی نے بتایا ہے کہ رہائی کے بعد جیل میں ظلم ڈھانے والے افسران اور متعلقہ حکام کو چھوڑوں گا نہیں۔
