وزیر مملکت برائے داخلہ سینیٹر طلال چوہدری نے جمعے کے روز علیمہ خان کے ساتھ پیش آئے واقعے پر ردعمل میں کہا جو پی ٹی آئی نے اپنے ورکرز کو سکھایا آج یہ خود اس کا شکار ہیں۔
طلال چوہدری نے کہا کہ انڈے ، جوتا اور سیاہی پھینکنا کس نے سکھایا؟ آج یہ لوگ خود اسی کا شکار ہیں۔
انہوں نے کہا انڈہ پھینکنے والی خواتین خیبر پختونخوا سے آئی تھیں، حفاظتی تحویل میں لینے اور حراست میں لینے میں فرق ہے، ان خواتین کے خلاف پولیس کو اب تک کوئی درخواست نہیں ملی۔
طلال چوہدری کا کہنا تھا پولیس انتظار کر رہی ہے کہ اسے درخواست ملے تو کارروائی آگے بڑھے، جن کی گاڑیاں توڑی گئیں ان کی درخواست بھی آئے تو کارروائی ہو گی۔
وزیر مملکت طلال چوہدری کا کہنا تھا کہ حکومت کو ایسی چھوٹی حرکت کرنے کی کوئی ضرورت نہیں ہے۔
خیال رہے کہ گزشتہ روز اڈیالہ جیل کے باہر عمران خان کی بہن علیمہ خان میڈیا سے گفتگو کررہی تھیں کہ اس وقت ان پر دو انڈے پھینکے گئے۔
گفتگو کے دوران ایک انڈہ علیمہ خان کو لگا جس کے بعد پارٹی کارکنان نے شور شرابہ شروع کردیا اور پولیس نے موقع سے 2 لڑکیوں کو حراست میں لے کر اڈیالہ چوکی منتقل کردیا۔
ترجمان راولپنڈی پولیس کے مطابق انڈہ پھینکنے والی خواتین کا تعلق پی ٹی آئی سے ہے۔
