دو روز قبل دبئی مال آنے والے خریدار اس وقت حیران رہ گئے جب انہوں نے متحدہ عرب امارات کے صدر شیخ محمد بن زاید النہیان کو اپنے درمیان انتہائی قریب سے دیکھا۔
شیخ محمد زاید النہیان کے ساتھ دبئی کے ولی عہد شیخ حمدان بن محمد بن راشد المکتوم، نائب وزیرِ اعظم اور وزیرِ دفاع بھی تھے۔
سماجی رابطے کی ویب سائٹ ایکس پر دبئی میڈیا آفس کی جانب سے ایک ویڈیو شیئر کی گئی جس میں اماراتی صدر اور وزیرِ دفاع کو وفد کے ہمراہ دبئی مال کا دورہ کرتے دیکھا جا سکتا ہے۔
یہ دورہ ایسے وقت میں سامنے آیا ہے جب خطے میں کشیدگی جاری ہے اور ایران کی جانب سے داغے گئے درجنوں ڈرونز اور حملوں کو متحدہ عرب امارات کے فضائی دفاعی نظام نے ناکام بنایا۔
ویڈیو میں دیکھا جا سکتا ہے کہ مال میں موجود خریدار اور ریسٹورنٹس میں بیٹھے افراد دونوں رہنماؤں کے گرد جمع ہوگئے، متعدد افراد نے ان کا خیر مقدم کیا اور اچانک ملاقات پر خوشی کا اظہار کیا۔
دوسری جانب سوشل میڈیا پر وائرل ہونے والی ایک ویڈیو میں گھانا سے تعلق رکھنے والے ایک شخص کو دونوں رہنماؤں کے قریب آ کر شیخ حمدان اور شیخ محمد سے مصافحہ کرتے دیکھا جاسکتا ہے جب کہ اس شخص نے ان کی خیریت دریافت کی جس پر خوش گوار جملوں کا تبادلہ ہوا۔
صدر شیخ محمد نے اس شخص سے دریافت کیا کہ آیا وہ خوش ہے؟ اس نے مسکراتے ہوئے جواب دیا ’جی ہاں، جی ہاں۔‘ صدر نے اس شخص کے لیے متحدہ عرب امارات میں خوش گوار قیام کے لیے نیک تمناؤں کا اظہار کیا۔
