اسٹیٹ بینک آف پاکستان نے نوجوانوں کیلئے ایک نیا فریم ورک متعارف کرا دیا جس کے تحت 13 سے 18 سال کی عمر کے نوجوان اب خود اپنے بینک اکاؤنٹ اور ڈیجیٹل والٹس کے مالک اور آپریٹر بن سکیں گے۔
مذکورہ اقدام کا اعلان بدھ کے روز کیا گیا جس کا مقصد نوجوانوں میں مالی شعور پیدا کرنا اور انہیں معیشت میں مؤثر حصہ لینے کیلئے تیار کرنا ہے۔
اسٹیٹ بینک کے مطابق اس فریم ورک کے تحت نوجوان اپنے اکاؤنٹس اور والٹس خود منظم کریں گے جس سے ان میں ذمہ داری اور مالی خود مختاری کا شعور بڑھے گا۔
نئے نظام میں حفاظت اور منظم رسائی کو یقینی بنایا گیا ہے تاکہ نوجوان محفوظ طریقے سے رسمی مالیاتی خدمات استعمال کر سکیں اور ڈیجیٹل معیشت کیلئے ضروری مہارت حاصل کریں۔
بیان میں مزید کہا گیا کہ ملک میں تقریباً 26 ملین نوجوان اس فریم ورک سے مستفید ہونے والے ہیں جو مستقبل میں مالیاتی لحاظ سے ماہر اور ڈیجیٹل طور پر ماہر نسل کی نشوونما میں مددگار ثابت ہو گا۔
اس اقدام کے ذریعے نوجوانوں کو مالیاتی اداروں کی پیش کردہ خدمات تک خود مختارانہ اور مؤثر رسائی حاصل ہو گی اور پاکستان میں مالی شمولیت کا ایک مضبوط اور نوجوان دوست نظام قائم ہو گا۔
