(ویب ڈیسک)محکمہ موسمیات نے موسم اوربارش کے حوالے سے اہم پیشگوئی کردی۔
محکمہ موسمیات کے مطابق بارشیں برسانے والا مغربی ہواؤں کا نیا سلسلہ آج ملک کے بالائی علاقوں میں داخل ہوگا جس کے نتیجے میں آئندہ چوبیس گھنٹوں کے دوران مختلف شہروں میں طوفانی بارشوں اور بالائی پہاڑوں پر برفباری کا امکان ہے۔
آج شروع ہونے والا موسلادھاربارشوں کا سلسلہ17اپریل تک وقفے وقفے سے جاری رہے گا،محکمہ موسمیات نے اس حوالے سے الرٹ جاری کر دیا ہے،آج چترال،دیر،سوات،مانسہرہ اور ایبٹ آباد سمیت مختلف اضلاع میں بادل برسنے کی توقع ہے،اسلام آباد، مری، راولپنڈی، لاہور اور سیالکوٹ میں کل بارش کا امکان ہے۔
گلگت بلتستان،آزاد کشمیر اور خیبرپختونخوا کے بالائی پہاڑی علاقوں میں برفباری کی پیشگوئی بھی کی گئی ہے جبکہ لینڈ سلائیڈنگ اورندی نالوں میں طغیانی کابھی امکان ہے۔
این ڈی ایم اےکے مطابق آج سے 17 اپریل تک اسلام آباد، پنجاب، خیبر پختونخوا، آزاد جموں کشمیر اور گلگت بلتستان میں وقفے وقفے سے بارش کی پیشگوئی کی گئی ہے۔
نیشنل ہائی وے اینڈ موٹر وے پولیس نے اس حوالے سے ایڈوائزری جاری کر دی ہے۔
ترجمان موٹروے پولیس کے مطابق بارش کے دوران غیر ضروری سفر سے گریز کریں، رفتار کم رکھیں اور اگلی گاڑی سے فاصلہ زیادہ رکھیں، گاڑی کی لائٹس اور وائپر درست حالت میں رکھیں، اچانک بریک لگانے سے گریز کریں،موبائل فون استعمال نہ کریں اور اپنی مکمل توجہ ڈرائیونگ پر مرکوز رکھیں، کسی بھی مدد کی صورت میں، نیشنل ہائی ویز اینڈ موٹروے پولیس ہیلپ لائن 130 پر رابطہ کیا جا سکتا ہے۔
محکمہ موسمیات کےمطابق آج کراچی میں کم سےکم درجہ حرارت 23.3ڈگری سینٹی گریڈاورہوا میں نمی کا تناسب 56 فیصد ریکارڈ کیا گیا،شہرقائدمیں زیادہ سےزیادہ درجہ حرارت 38 ڈگری سینٹی گریڈ تک ہونےکاامکان ہے۔
محکمہ موسمیات کا کہنا ہےکہ شمال مشرقی سمت سے4کلومیٹرفی گھنٹہ کی رفتارسےہوائیں چل رہی ہیں،آئندہ ہفتے تک کراچی میں بارش کا کوئی امکان نہیں ہے۔
