(ویب ڈیسک) قومی ایئر لائن نے حج 2026 کے لیے اپنے قبل از حج آپریشن کا باقاعدہ شیڈول جاری کر دیا۔
پی آئی اے کی جانب سے جاری کئے گئے شیڈول کے مطابق 19 اپریل سے عازمینِ حج کی روانگی شروع ہو جائے گی۔
ترجمان پی آئی اے کے مطابق رواں سال 191 پروازوں کے ذریعے مجموعی طور پر 55 ہزار سے زائد عازمین کو حجازِ مقدس پہنچایا جائے گا، ان میں سرکاری حج سکیم کے تحت 49 ہزار اور پرائیویٹ حج گروپس کے 6 ہزار سے زائد عازمین شامل ہیں۔
حج آپریشن اسلام آباد، کراچی، لاہور، ملتان، فیصل آباد، سیالکوٹ اور کوئٹہ سے براہِ راست پروازوں کے ذریعے انجام دیا جائے گا،شیڈول کے مطابق قبل از حج آپریشن کی پہلی پرواز پی کے 747 سیالکوٹ سے 19 اپریل کی رات 01:55 بجے 390 سے زائد عازمین کو لے کر مدینہ منورہ روانہ ہوگی،اسی روز فیصل آباد سے بھی ایک پرواز 150 عازمین کو لے کر روانہ ہوگی، ملتان سے پہلی حج پرواز 20 اپریل، اسلام آباد اور کوئٹہ سے 21 اپریل، کراچی سے 23 اپریل جبکہ لاہور سے پہلی پرواز 24 اپریل کو روانہ ہوگی۔
ترجمان پی آئی اے کے مطابق اسلام آباد سے 15,400 سے زائد، کراچی سے 15,000، لاہور سے 12,377، ملتان سے 5,383، کوئٹہ سے 4,487، فیصل آباد سے 3,680 اور سیالکوٹ سے 2,075 عازمین کو سعودی عرب پہنچایا جائے گا،پی آئی اے کا یہ قبل از حج آپریشن 21 مئی کو اختتام پذیر ہوگا۔
سی ای او پی آئی اے کی جانب سے تمام ٹیموں کو ہدایت کی گئی ہے کہ عازمین کی خدمت میں کوئی کسر نہ چھوڑی جائے، پاکستان اور سعودی عرب کے ایئرپورٹس پر پی آئی اے کا عملہ عازمین کی رہنمائی کے لیے ہمہ وقت موجود رہے گا۔
