لاہور: معروف یوٹیوبر سعد الرحمان عرف ڈکی بھائی کا نام پی این آئی ایل کی فہرست سے نکال دیا گیا۔
لاہور کی مقامی عدالت میں معروف یوٹیوبر سعد الرحمان عرف ڈکی بھائی کے خلاف زیر سماعت مقدمے میں اہم پیش رفت سامنے آئی۔ جہاں عدالت نے ان کے نام کو پاسپورٹ کنٹرول لسٹ سے نکالنے سے متعلق درخواست پر سماعت کی۔
دوران سماعت سعد الرحمان سمیت دیگر ملزمان عدالت میں پیش ہوئے اور اپنی حاضری مکمل کروائی۔ ملزمان کے خلاف نیشنل سائبر کرائم انویسٹی گیشن ایجنسی (این سی سی آئی اے) کی جانب سے مبینہ طور پر آن لائن جوا ایپس کی تشہیر سے متعلق مقدمہ درج کیا گیا ہے۔
عدالتی کارروائی کے دوران این سی سی آئی اے نے عدالت میں رپورٹ جمع کروائی جس میں بتایا گیا کہ یوٹیوبر کا نام پی این آئی ایل لسٹ سے نکال دیا گیا ہے۔
رپورٹ کے مطابق ابتدائی طور پر تفتیش میں عدم تعاون کے باعث ان کا نام اس فہرست میں شامل کیا گیا تھا۔ تاہم بعد ازاں ضمانت کے بعد وہ شامل تفتیش ہو گئے۔
تفتیشی حکام نے عدالت کو آگاہ کیا کہ سعد الرحمان کا نام پاسپورٹ کنٹرول لسٹ سے نکالنے میں اب کوئی اعتراض نہیں۔ اور اس حوالے سے متعلقہ حکام کو باقاعدہ مراسلہ بھی ارسال کر دیا گیا ہے جس میں نام کے اخراج کی سفارش کی گئی ہے۔
واضح رہے کہ سعد الرحمان کے خلاف آن لائن جوا ایپ کی مبینہ پروموشن کے الزام میں مقدمہ درج ہے۔ تاہم حالیہ پیش رفت میں انہیں انتظامی سطح پر بڑا ریلیف مل گیا۔
