کراچی: ایڈیشنل سیشن جج وسطی کی عدالت نے مذہبی جذبات سے متعلق کیس میں معروف یوٹیوبر رجب بٹ کی عبوری ضمانت منسوخ کر دی ہے۔
تفصیلات کے مطابق جمعہ کے روز سماعت کے دوران رجب بٹ عدالت میں پیش نہ ہوئے، جس پر عدالت نے ان کی عدم حاضری کے باعث ان کی پیشگی ضمانت واپس لینے کا حکم جاری کیا۔
کراچی میں گٹر کے ڈھکن لگادو بھائی؛ فخرعالم کا مرتضیٰ وہاب کیلیے پیغام وائرل
اضافی سیشن جج کی عدالت میں ہونے والی کارروائی کے دوران فریقین کے دلائل سنے گئے۔ ملزم کے وکیل نے مؤقف اختیار کیا کہ رجب بٹ کی طبیعت ناساز ہے، اسی وجہ سے وہ عدالت میں پیش نہیں ہو سکے۔
دوسری جانب شکایت کنندہ کے وکیل نے اس مؤقف کی مخالفت کرتے ہوئے کہا کہ ملزم بارہا مختلف وجوہات کا سہارا لے کر عدالت سے غیر حاضر رہتا ہے، لہٰذا انہیں مزید رعایت نہ دی جائے اور کیس کی کارروائی بغیر تاخیر کے آگے بڑھائی جائے۔
واضح رہے کہ رجب بٹ کے خلاف مقدمہ تھانہ ہائیڈری مارکیٹ میں درج ہے، جس میں ان پر اسلامی اقدار کی مبینہ بے حرمتی کے الزامات عائد کیے گئے ہیں۔
