کراچی : ایڈیشنل آئی جی کراچی آزاد خان کا کہنا ہے کہ انمول پنکی ایک چالاک ملزمہ ہے، تفتیش مکمل ہونے تک نہیں بتا سکتے کہ ملزمہ انمول کے پیچھے کون ہے؟
تفصیلات کے مطابق ایڈیشنل آئی جی آزاد خان نے انمول عرف پنکی کیس کے حوالے سے اہم گفتگو کرتے ہوئے اسے ایک انتہائی سنگین سماجی مسئلہ قرار دیتے ہوئے واضح کیا کہ یہ صرف ایک عام جرم نہیں بلکہ ہماری آنے والی نسلوں کے مستقبل کا معاملہ ہے، اور پولیس اس کیس کی تفتیش بغیر کسی دباؤ کے مکمل میرٹ پر کر رہی ہے۔
ایڈیشنل آئی جی آزاد خان نے ملزمہ کے وکیل کی جانب سے کیے جانے والے تمام دعووں کو یکسر مسترد کر دیا۔ انہوں نے کہا ملزمہ کا جسمانی ریمانڈ نہ لینے کے لیے اس کے وکیل نے عدالت میں بہت سی باتیں کیں اور جج کے ذہن میں شکوک و شبہات پیدا کرنے کی بھرپور کوشش کی لیکن وکیل نے عدالت میں جو بھی باتیں کیں، ان کا حقیقت سے دور دور تک کوئی تعلق نہیں ہے۔
ایڈیشنل آئی جی کا کہنا تھا کہ کیس کی انکوائری ابھی بالکل ابتدائی مرحلے میں ہے ،کیس میں ابھی تفتیش کا آغاز کیا گیا ہے جسے مکمل طور پر میرٹ کی بنیاد پر آگے بڑھایا جائے گا۔ تفتیش مکمل ہونے سے پہلے یہ نہیں بتایا جا سکتا کہ ملزمہ انمول کے پیچھے کون ہے اور کون اس کی پشت پناہی کر رہا ہے۔”
انہوں نے مزید اصرار کیا کہ پولیس پر ملزمہ انمول سے متعلق کسی قسم کا کوئی سیاسی یا انتظامی دباؤ نہیں ہے تاہم تفتیش کے دوران جو بھی حقائق یا بااثر نام سامنے آئیں گے، ان کے خلاف قانون کے مطابق کارروائی ہو گی ،کسی کو بھی معاف نہیں کیا جائے گا۔
آزاد خان نے انکشاف کیا کہ ملزمہ کی عدالت میں پیشی کے معاملے پر سیکیورٹی یا انتظامی غفلت سامنے آنے پر محکمہ جاتی کارروائی کی گئی ہے۔
انہوں نے بتایا کہ عدالت پیشی کے معاملے پر متعلقہ ایس ایس پی ، ایس ایچ او اور انویسٹی گیشن آفیسر کے خلاف سخت کارروائی عمل میں لائی جا چکی ہے تاکہ تفتیش کی شفافیت پر کوئی حرف نہ آئے۔
