غزہ کے محکمہ صحت کے حکام کے مطابق 18 اگست 2026 کو غزہ سٹی کی بندرگاہ پر اسرائیلی فضائی حملے میں کم از کم 5 فلسطینی جاں بحق جبکہ 12 سے زائد زخمی ہوئے۔
رپورٹس کے مطابق حملہ بندرگاہ کے علاقے میں موجود ایک کیفے اور بے گھر فلسطینیوں کے خیموں کے قریب کیا گیا۔ الشفا اسپتال نے ابتدائی طور پر 5 لاشیں اور 13 زخمی موصول ہونے کی اطلاع دی، جن میں سے ایک زخمی بعد میں دم توڑ گیا۔
غزہ کی سول ڈیفنس کے ترجمان محمود بسال کے مطابق جاں بحق افراد میں ایک بچہ بھی شامل ہے۔ عینی شاہدین نے بتایا کہ اسرائیلی جنگی طیاروں نے بندرگاہ کے مغربی حصے میں واقع ’’سویٹ اینڈ بٹر‘‘ کیفے پر دو میزائل داغے۔
دوسری جانب اسرائیلی فوج نے حملے کی تصدیق کرتے ہوئے کہا کہ کارروائی کا ہدف حماس کے متعدد کمانڈر تھے، جن پر اسرائیلی فوج کے خلاف حملوں کی منصوبہ بندی کا الزام عائد کیا گیا۔ اسرائیلی فوج نے حملے کو ’’درست فضائی کارروائی‘‘ قرار دیا اور کہا کہ شہریوں کو نقصان سے بچانے کے لیے اقدامات کیے گئے۔
