جنوبی افریقا کے اسٹار فاسٹ بولر کگیسو ربادا دائیں ٹانگ کی ہیمسٹرنگ انجری کے باعث آسٹریلیا کے خلاف آئندہ ماہ ہونے والی تین میچز کی ون ڈے سیریز سے باہر ہوگئے ہیں۔
جنوبی افریقی کرکٹ بورڈ کے مطابق ربادا انجری سے بحالی کے ابتدائی مرحلے میں ہیں اور انہیں کم از کم ساڑھے چار ہفتے مزید ایکشن سے دور رہنا پڑے گا۔
ربادا کی آسٹریلیا کے خلاف تین ٹیسٹ میچز پر مشتمل سیریز میں شرکت بھی فٹنس سے مشروط ہے، جس کا آغاز 9 اکتوبر سے ہوگا۔ بورڈ کا کہنا ہے کہ ٹیسٹ سیریز کے لیے ربادا کی دستیابی کا فیصلہ ان کی بحالی اور فٹنس کی صورتحال کو دیکھتے ہوئے بعد میں کیا جائے گا۔
بورڈ نے ربادا کی انجری کی شدت یا گریڈ کے حوالے سے مزید تفصیلات جاری نہیں کیں۔
ربادا کی انجری جنوبی افریقا کے لیے بڑا دھچکا ہے کیونکہ وہ ٹیم کے اہم ترین ریڈ بال فاسٹ بولرز میں شمار ہوتے ہیں۔ 2025 ورلڈ ٹیسٹ چیمپئن شپ کے فائنل میں آسٹریلیا کے خلاف ربادا نے 9 وکٹیں حاصل کرکے جنوبی افریقا کی فتح میں اہم کردار ادا کیا تھا۔
ان کی ممکنہ غیر موجودگی میں لنگی نگیدی، مارکو جینسن اور کوربن بوش پر بولنگ اٹیک کی ذمہ داری بڑھ سکتی ہے، جبکہ کوینا مافاکا، ڈین پیٹرسن اور ویان ملڈر بھی متبادل آپشنز کے طور پر موجود ہیں۔
اس کے علاوہ طویل عرصے سے ٹیسٹ کرکٹ سے دور اینرک نورکیا اور جیرالڈ کوئٹزے بھی ٹیسٹ اسکواڈ میں جگہ کے ممکنہ امیدوار ہوسکتے ہیں۔
جنوبی افریقا اور آسٹریلیا کے درمیان ٹیسٹ سیریز سے قبل ربادا کی فٹنس پر نظر رکھی جائے گی، کیونکہ ان کی واپسی جنوبی افریقی ٹیم کے لیے خاصی اہمیت رکھتی ہے۔
