اسلام آباد، کراچی(نیوز ایجنسیاں ) پاکستان کو ایل این جی کی خریداری کیلئے ٹینڈر پر کوئی بولی نہیں آئی۔ملک میں بجلی کی پیداوارکیلئے مائع قدرتی گیس (ایل این جی) کی درآمد کا معاملہ ایک بار پھر تعطل کا شکار ہو گیا، ادھرحکومت نے 7لاکھ 50ہزارباقی صفحہ 4بقیہ نمبر 12
میٹرک ٹن گندم درآمد کرنے کی باقاعدہ منظوری دیدی ،ٹینڈر جاری کردیا ۔ حکومت رواں ماہ کے دوران تیسری مرتبہ بھی ایل این جی کارگو خریدنے میں ناکام رہی ہے۔ پاکستان ایل این جی لمیٹڈ (پی ایل ایل)کے ذرائع کے مطابق تازہ ترین ٹینڈر میں ایل این جی کارگو کی فراہمی کیلئے کسی بھی عالمی کمپنی نے کوئی بولی جمع نہیں کرائی۔پی ایل ایل نے بارہ سے سولہ ستمبر کے درمیان ترسیل کے لیے عالمی کمپنیوں سے ایک کارگو کی خریداری کیلئے بولیاں طلب کی تھیں، جن کی آٹھ ستمبر تک جمع کرانے کی آخری تاریخ مقرر تھی۔ تاہم، مقررہ وقت تک پی ایل ایل کو اس تیسرے ٹینڈر پر کوئی بھی بولی موصول نہیں ہوئی۔اس سے قبل حکومت اس ماہ کے دوران دو مرتبہ ایل این جی کارگو کے ٹینڈر منسوخ کر چکی ہے۔ چار سے آٹھ ستمبر اور آٹھ سے بارہ ستمبر کے دوران منگوائے گئے کارگو کے لیے موصول ہونے والی بولیاں انتہائی مہنگی ہونے کی وجہ سے منسوخ کی گئی تھیں۔پی ایل ایل کو چار سے آٹھ ستمبر کے عرصے کے لیے چھبیس عشاریہ چھیانوے ڈالر فی ایم ایم بی ٹی یو کی ایک ہی بولی موصول ہوئی تھی۔ اسی طرح آٹھ سے بارہ ستمبر کے لیے پی ایل ایل کو دو بولیاں موصول ہوئی تھیں، جن میں پہلی بولی چھبیس عشاریہ اکہتر اور دوسری بولی چھبیس عشاریہ اٹھانوے ڈالر فی ایم ایم بی ٹی یو تھی۔دوسری جانب حکومت نے 7لاکھ 50ہزار میٹرک ٹن گندم درآمد کرنے کی باقاعدہ منظوری دیدی۔ ٹریڈنگ کارپوریشن آف پاکستان (ٹی سی پی) نے گندم کی درآمد کیلئے بین الاقوامی ٹینڈر جاری کردیا۔ٹی سی پی کے مطابق درآمد کی جانے والی گندم تازہ ترین فصل سے حاصل شدہ ہونی چاہیے، جبکہ عالمی سپلائرز کی جانب سے کم از کم 50 ہزار میٹرک ٹن کی پیشکش ہی قابلِ قبول ہوگی۔ٹی سی پی کے ٹینڈر کے تحت گندم کی ترسیل کراچی اور گوادر کی بندرگاہوں پر سی ایف آر کی بنیاد پر کی جائے گی۔ گندم کی درآمد کے لئے بولیاں 16 ستمبر تک جمع کرائی جا سکیں گی اور اسی روز بولیاں کھولی جائیں گی۔ٹی سی پی کے مطابق درآمدی گندم کو صوبوں کی طلب اور ضرورت کو مدنظر رکھتے ہوئے تقسیم کیا جائے گا۔ مجموعی طور پر 3 لاکھ ٹن گندم سندھ، 2 لاکھ 50 ہزار ٹن پنجاب جبکہ 2 لاکھ ٹن خیبرپختونخوا کو فراہم کی جائے گی۔اقتصادی سروے 2025-26 کے مطابق ملک میں گندم کی سالانہ کھپت تقریبا 3 کروڑ 13 لاکھ ٹن ہے، جبکہ گزشتہ مالی سال گندم کی پیداوار 2 کروڑ 96 لاکھ 10 ہزار ٹن رہی۔
ایل این جی
