پنجاب بھر میں غیرفعال فلٹریشن پلانٹس کی بحالی سے متعلق اجلاس کا انعقاد

لاہور (خبر نگار) پنجاب صاف پانی اتھارٹی کے ہیڈ آفس لاہور میں صوبہ بھر میں غیر فعال واٹر فلٹریشن پلانٹس کی بحالی اور نئے منصوبوں سے متعلق اہم اجلاس منعقد ہوا۔ اجلاس کی صدارت سی ای او پنجاب صاف پانی اتھارٹی ذوالفقار احمد بھون نے کی
جبکہ کنٹریکٹرز اور کنسلٹنٹس نے شرکت کی۔ اجلاس میں لاہور سمیت پنجاب بھر میں736 غیر فعال واٹر فلٹریشن پلانٹس کی بحالی کے کام کا تفصیلی جائزہ لیا گیا۔ سی ای او ذوالفقار احمد بھون نے متعلقہ کنٹریکٹرز اور کنسلٹنٹس کو بحالی کے کام میں تیزی لانے اور تمام منصوبے مقررہ مدت کے اندر مکمل کرنے کی ہدایت کی۔ اس موقع پر سی ای او ذوالفقار احمد بھون نے کہا کہ رواں سال کے اختتام تک پنجاب بھر کے تمام غیر فعال واٹر فلٹریشن پلانٹس بحال کر دیئے جائیں گے تاکہ شہریوں کو صاف اور محفوظ پینے کے پانی کی فراہمی یقینی بنائی جاسکے۔ انہوں نے ہدایت کی کہ بحال کیے جانے والے تمام فلٹریشن پلانٹس کی GPS تصاویر بھی لازمی شیئر کی جائیں تاکہ منصوبوں کی پیش رفت اور بحالی کے عمل کی موثر نگرانی کی جاسکے۔ اجلاس میں پنجاب بھر میں مزید نئے تعمیر ہونے والے واٹر فلٹریشن پلانٹس کے ڈیزائن پر بھی تفصیلی مشاورت کی گئی۔ سی ای او نے کہا کہ نئے منصوبوں میں جدید تقاضوں، پائیداری اور کم آپریشنل اخراجات کو مدنظر رکھا جائے گا۔ ذوالفقار احمد بھون نے مزید کہا کہ واٹر فلٹریشن پلانٹس کو سولر پاور بیک اپ سے منسلک کیا جائے گا جس سے بجلی کے اخراجات میں نمایاں کمی آئے گی اور فلٹریشن پلانٹس کی مسلسل فعالیت کو یقینی بنانے میں مدد ملے گی۔ سی ای او پنجاب صاف پانی اتھارٹی نے کہا کہ وزیراعلی پنجاب مریم نواز کی ہدایات اور وژن کے تحت عوام کو صاف اور محفوظ پینے کے پانی کی فراہمی کے لیے جامع پلان مرتب کیا گیا ہے۔ پنجاب صاف پانی اتھارٹی صوبہ بھر میں صاف پانی کی سہولت کی فراہمی، غیر فعال فلٹریشن پلانٹس کی بحالی اور نئے منصوبوں کے قیام کے لیے موثر اقدامات جاری رکھے گی۔