وزیراعلیٰ سندھ مراد علی شاہ سے ملائیشیا کے نئے قونصل جنرل محمد یونس ابراہیم کی ملاقات

کراچی(این این آئی)وزیراعلیٰ سندھ سید مراد علی شاہ سے ملائیشیا کے نئے قونصل جنرل محمد یونس ابراہیم نے ملاقات کی، جس میںپاکستان اور ملائیشیا کے تعلقات، باہمی دلچسپی کے امور اور دوطرفہ تعاون کے فروغ سمیت سندھ اور ملائیشیا کے درمیان معاشی و تجارتی روابط مزید مستحکم کرنے پر تفصیلی تبادلہ خیال کیا گیا۔وزیراعلیٰ سندھ سید مراد علی شاہ نے محمد یونس ابراہیم کو ملائیشیا کے قونصل جنرل کی حیثیت سے تعیناتی پر مبارکباد دیتے ہوئے سندھ میں ان کا خیرمقدم کیا اور یقین دہانی کرائی کہ صوبائی حکومت کی جانب سے انہیں ہر ممکن تعاون فراہم کیا جائے گا۔سید مراد علی شاہ نے ملائیشین سرمایہ کاروں کو سندھ کی تیزی سے ابھرتی ہوئی مارکیٹ میں سرمایہ کاری کے مواقع سے فائدہ اٹھانے کی دعوت دیتے ہوئے کہا کہ سندھ میں مختلف شعبوں میں سرمایہ کاری کے وسیع امکانات موجود ہیں، جبکہ صوبائی حکومت سرمایہ کاری کے فروغ کے لیے سازگار ماحول فراہم کرنے کے لیے اقدامات کررہی ہے۔