پنجاب میں ہائرایجوکیشن میں لڑکوں کے داخلوں میں تشویشناک کمی

لاہور (جنرل رپورٹر)پنجاب میں ہائر ایجوکیشن میں لڑکوں کے داخلوں میں تشویشناک کمی کا انکشاف، مہنگائی اور تعلیمی اخراجات نے متوسط و کم آمدن طبقے کے بچوں کی تعلیم مشکل بنا دی، پنجاب میں بڑھتی مہنگائی اور تعلیم کے بڑھتے اخراجات کے باعث لڑکوں کے ہائر ایجوکیشن میں داخلوں میں تشویشناک کمی کا انکشاف ہوا ہے۔ سرکاری کالجوں میں انٹرمیڈیٹ داخلوں کے لیے موصول ہونے والی آن لائن درخواستوں میں طالبات کا تناسب لڑکوں کے مقابلے میں نمایاں طور پر زیادہ ریکارڈ کیا گیا ہے۔ دستاویزات کے مطابق پنجاب بھر کے سرکاری کالجوں میں انٹرمیڈیٹ داخلوں کے لیے اب تک 1 لاکھ 60 ہزار سے زائد درخواستیں موصول ہوئی ہیں، جن میں ایک لاکھ 9ہزار سے زائد طالبات جبکہ تقریباً 51ہزار طلبا شامل ہیں۔ یوں مجموعی درخواستوں میں طالبات کا حصہ68 فیصد جبکہ لڑکوں کا صرف 32 فیصد بنتا ہے۔ اعدادوشمار کے مطابق ایف اے کی57 ہزار، آئی سی ایس کی 54 ہزار اور ایف ایس سی پری میڈیکل کی 28 ہزار درخواستیں موصول ہوئی ہیں۔ پری میڈیکل میں طالبات کا تناسب سب سے زیادہ 81فیصد، ایف اے میں 74فیصد جبکہ آئی سی ایس میں61فیصد ریکارڈ ہوا۔ فنی شعبوں میں بھی ایف اے آئی ٹی میں طالبات کا حصہ 65 فیصد رہا، تاہم ڈی آئی ٹی اور ڈی کام میں لڑکوں کی تعداد زیادہ رہی۔ ماہرین تعلیم کے مطابق مہنگائی، فیسوں، کتابوں، ٹرانسپورٹ اور ہاسٹل کے بڑھتے اخراجات کے ساتھ روزگار کے محدود مواقع کے باعث کم اور متوسط طبقے کے خاندانوں کے لیے بیٹوں کی اعلی تعلیم جاری رکھنا مشکل ہوتا جا رہا ہے۔ ماہرین کا کہنا ہے کہ لڑکوں کا ہائر ایجوکیشن سے بتدریج دور ہونا مستقبل میں ہنرمند افرادی قوت اور روزگار کے بحران کو مزید سنگین کر سکتا ہے، جس پر حکومت کو محض داخلوں کے اعدادوشمار کے بجائے اس کے بنیادی معاشی اسباب کا بھی جائزہ لینا ہوگا۔