دہشتگردوں کے خلاف کامیاب کارروائی، وزیراعلیٰ سندھ کی سکیورٹی فورسز کو خراجِ تحسین

کراچی(این این آئی)وزیراعلیٰ سندھ سید مراد علی شاہ نے بلوچستان کے علاقوں خاران اور واشک  میں سکیورٹی فورسز کے کامیاب انٹیلی جنس بیسڈ آپریشنز کے دوران 11 دہشتگردوں کی ہلاکت پر قوم کو مبارکباد دیتے ہوئے سکیورٹی فورسز کو خراجِ تحسین پیش کیا ہے۔اپنے بیان میں وزیراعلیٰ سندھ نے کہا کہ دہشتگردوں کے خلاف کامیاب کارروائی پر سکیورٹی فورسز کو سلام پیش کرتے ہیں، جنہوں نے بروقت اور مؤثر کارروائی کرتے ہوئے دہشتگردوں کے مذموم عزائم کو ناکام بنا دیا۔ انہوں نے کہا کہ سکیورٹی فورسز نے ایک بار پھر اپنی پیشہ ورانہ صلاحیتوں اور عزم کا لوہا منوایا ہے۔سید مراد علی شاہ نے کہا کہ وطن کے دفاع اور ملک میں امن کے قیام کے لیے سکیورٹی فورسز کی قربانیاں پوری قوم کے لیے باعثِ فخر ہیں۔ بہادر جوان اپنی جانوں کی پروا کیے بغیر ملک دشمن عناصر کے خلاف برسرپیکار ہیں اور قوم ان کی قربانیوں کو قدر کی نگاہ سے دیکھتی ہے۔وزیراعلیٰ سندھ نے کہا کہ دہشتگردی کے خلاف جنگ میں پوری قوم اپنی بہادر سکیورٹی فورسز کے ساتھ کھڑی ہے۔ ملک دشمن عناصر کے مذموم عزائم کو کسی صورت کامیاب نہیں ہونے دیا جائے گا اور دہشتگردی کے مکمل خاتمے تک یہ جنگ جاری رہے گی۔