کراچی (این این آئی) شہر کے مختلف علاقوں میں پولیس اور مبینہ ڈاکوؤں کے درمیان ہونے
والے مقابلوں میں 2 ملزمان ہلاک جبکہ 3 زخمی حالت میں گرفتار کرلیے گئے جبکہ 2 ملزمان فرار ہونے میں کامیاب ہوگئے۔ پولیس کے مطابق گرفتار اور ہلاک ملزمان کے قبضے سے اسلحہ، موبائل فون، نقد رقم اور موٹرسائیکل سمیت دیگر سامان برآمد ہوا ہے۔ منگھوپیر کے علاقے چھوٹا نہر کے قریب پولیس اور مبینہ ڈاکوؤں کے درمیان مقابلے میں ایک ملزم ہلاک ہوگیا۔ ریسکیو حکام کے مطابق ہلاک ملزم کی لاش عباسی شہید ہسپتال منتقل کی گئی جہاں اس کی شناخت 45 سالہ خرم ولد مسعود احمد کے نام سے ہوئی۔ دوسری جانب اینٹی وہیکل لفٹنگ سیل کی پولیس پارٹی نے ناردرن بائی پاس پر کالی مٹی فیکٹری کے قریب مبینہ مقابلے کے دوران ایک ملزم کو ہلاک کر دیا جبکہ اس کے دو ساتھی فرار ہوگئے۔ پولیس کے مطابق ہلاک ملزم خرم 30 سے زائد مقدمات میں مطلوب تھا اور اس کا تعلق بین الصوبائی کار لفٹر گروہ سے بتایا جاتا ہے۔ پولیس کا کہنا ہے کہ ملزم گاڑی چوری، ڈکیتی اور غیر قانونی اسلحہ رکھنے سمیت مختلف جرائم میں ملوث تھا اور اس سے قبل بھی 34 مقدمات میں گرفتار ہوچکا تھا۔ پولیس نے ملزم کے قبضے سے اسلحہ، موبائل فون، نقد رقم اور سمن آباد کے علاقے سے چوری کی گئی کار برآمد کرنے کا دعویٰ کیا ہے۔ ادھر نارتھ ناظم آباد پولیس نے منگل اور بدھ کی درمیانی شب بلاک بی میں صائمہ برج ویو اپارٹمنٹ کے قریب مبینہ مقابلے کے بعد ایک ملزم کو زخمی حالت میں گرفتار کر لیا۔ کراچی پولیس کے ترجمان کے مطابق گرفتار ملزم کی شناخت 25 سالہ عالم خان ولد لال خان کے نام سے ہوئی جبکہ اس کا ساتھی فرار ہوگیا۔ پولیس کے مطابق زخمی ملزم کے قبضے سے پستول اور گولیاں، موبائل فون، نقد رقم اور موٹرسائیکل برآمد ہوئی۔ ملزم کو طبی امداد کے لیے عباسی شہید ہسپتال منتقل کردیا گیا۔ نیوکراچی کے سیکٹر 11 آئی ٹاؤن آفس کے قریب بھی پولیس اور مبینہ ڈاکوؤں کے درمیان مقابلہ ہوا جس کے نتیجے میں ایک ملزم زخمی حالت میں گرفتار کرلیا گیا۔ ریسکیو حکام کے مطابق زخمی ملزم کو عباسی شہید ہسپتال منتقل کیا گیا، جہاں اس کی شناخت فرقان کے نام سے ہوئی۔ پولیس کا کہنا ہے کہ گرفتار ملزم کے قبضے سے اسلحہ، موبائل فون، نقد رقم اور موٹرسائیکل برآمد ہوئی ہے۔ اسی طرح سرجانی ٹاؤن کے سیکٹر 4 سی میں پولیس کے مبینہ مقابلے کے دوران ایک ملزم زخمی حالت میں گرفتار کرلیا گیا۔ ریسکیو حکام کے مطابق گرفتار ملزم کی شناخت عبدالقادر عرف ڈاڈا کے نام سے ہوئی جسے طبی امداد کے لیے عباسی شہید ہسپتال منتقل کیا گیا۔ پولیس کے مطابق عبدالقادر کے قبضے سے اسلحہ، موبائل فون اور نقد رقم برآمد ہوئی ہے۔ پولیس کا کہنا ہے کہ تمام واقعات کی مزید تفتیش جاری ہے اور فرار ہونے والے ملزمان کی گرفتاری کے لیے بھی کارروائیاں کی جا رہی ہیں۔
