پرویز الٰہی کیخلاف کرپشن ،کک بیکس ریفرنس کیس کی سماعت 22 اکتوبر تک ملتوی

لاہور (این این آئی) لاہور کی احتساب عدالت نے سابق وزیر اعلیٰ پنجاب چودھری پرویز الٰہی و دیگر کے خلاف گجرات
کے ترقیاتی منصوبوں میں کرپشن اور کک بیکس ریفرنس پر سماعت 22اکتوبر تک ملتوی کر دی ۔ احتساب عدالت کے جج رانا عارف نے کیس کی سماعت کی ۔ سابق پرنسپل سیکرٹری پنجاب اسمبلی محمد خان بھٹی سمیت دیگر ملزمان پیش ہوئے جبکہ پرویز الٰہی کی جگہ ان کے نمائندے حاضری کے لیے پیش ہوئے۔عدالت نے بیماری کے باعث پرویز الٰہی کو مستقل حاضری سے استثنیٰ دے رکھا ہے اور مختیار احمد رانجھا کو ان کا پلیڈر مقرر کر رکھا ہے۔ نیب کے گواہان شہادت ریکارڈ کرانے کے لیے عدالت میں پیش ہوئے تاہم ملزمان کے وکلاء نے کارروائی ملتوی کرنے کی استدعا کی۔ معاون وکیل نے موقف اختیار کیا کہ سینئر وکیل آج دستیاب نہیں۔ احتساب عدالت نے سماعت کرتے ہوئے ریفرنس کی مزید کارروائی 22 اکتوبر تک ملتوی کردی اور نیب کے گواہان کو آئندہ پیشی پر حاضری یقینی بنانے کا پابند کردیا۔