ذیابیطس کے بڑھتے بحران سے نمٹنے کیلئے قومی سطح پر موثر اقدامات ناگزیر ہیں، مصطفی کمال

اسلام آباد(آئی این پی )وفاقی وزیر برائے صحت سید مصطفی کمال نے ذیابیطس سے بچا ئواور اس پر قابو پانے کو قومی ترجیح قرار دیتے ہوئے کہا ہے کہ بیماری کے علاج کے ساتھ ساتھ روک تھام، بروقت تشخیص، فوری مداخلت اور عوامی آگاہی پر خصوصی توجہ دینا ہوگی۔ اسلام آباد کے مقامی ہوٹل میں قومی وزیراعظم پروگرام برائے انسداد و کنٹرول ذیابیطس کے تحت ذیابیطس سے بچائو اور کنٹرول کے لئے میڈیا مہم کی حکمت عملی سے متعلق قومی مشاورتی ورکشاپ کا انعقاد کیا گیا، جس میں وفاقی قیادت، پالیسی سازوں، طبی ماہرین، ترقیاتی شراکت داروں، میڈیا نمائندوں اور مختلف اداروں کے حکام نے شرکت کی۔ وفاقی وزیر صحت سید مصطفی کمال نے قومی مکالمے کی قیادت کرتے ہوئے کہا کہ ذیابیطس کی روک تھام اور کنٹرول کو قومی صحت کی ترجیحات میں نمایاں مقام حاصل ہونا چاہیے۔