محکمہ صحت میں بڑے افسران کی بڑی کرپشن، پرکشش سیٹوں پر جونیئر افسران تعینات

لاہور (جنرل رپورٹر) محکمہ صحت میں بڑے افسران کی بڑی کرپشن، پرکشش سیٹوں پر جونیئر افسران تعینات کر دیئے گئے۔ تفصیلات کے مطابق نرسنگ کالج میں 18ویں گریڈ میں ترقی پانے والی تینوں افسران کے بیرونِ اضلاع تبادلے کے بعد کالج میں 18ویں گریڈ کی افسر کی تعیناتی نہ ہونے کا انکشاف ہوا ہے۔ محکمہ صحت کے ذرائع کے مطابق لاہور سے شمائلہ انجم کو پرنسپل تعینات کیا گیا ہے تاہم ذرائع کا دعوی ہے کہ وہ مظفرگڑھ جوائن نہیں کریں گی جس کے نتیجے میں 18ویں گریڈ کی تینوں آسامیوں پر بھی کسی خاتون افسر کی تعیناتی نہیں ہوگی اور 17ویں گریڈ کی جونیئر انسٹرکٹر تہمینہ بانو بدستور پرنسپل کے عہدے پر کام کرتی رہیں گی۔ ذرائع کے مطابق سابق پرنسپل کو مبینہ طور پر دو گمنام درخواستوں کی بنیاد پر عہدے سے ہٹا کر جونیئر ترین انسٹرکٹر کو پرنسپل تعینات کیا گیا تھا۔ ذرائع نے ایک سال کی تعیناتی کے مبینہ وعدے اور مالی معاملات کے الزامات بھی عائد کیے ہیں تاہم ان الزامات کی آزادانہ تصدیق نہیں ہوسکی۔ عوامی و سماجی حلقوں نے معاملے کی شفاف تحقیقات اور ذمہ دار افسران کے احتساب کا مطالبہ کرتے ہوئے سوال اٹھایا ہے کہ 18ویں گریڈ کی افسران کی موجودگی کے باوجود جونیئر افسر کو پرنسپل رکھنے کی اصل وجہ کیا ہے اور کیا مبینہ بے ضابطگیوں کی بھی کوئی انکوائری ہوگی۔